O 12 de agosto está marcado no calendario como unha data científica imprescindible. Unha eclipse solar total está a producir expectación e unha boa parte de Galicia será un dos mellores lugares do mundo para observala. De feito, en seis dos nove destinos Starlight da comunidade poderá verse na súa totalidade: Chantada, Muras, Trevinca, Ancares, Mariñas Coruñesas e nunha parte da Costa da Morte. Nos outros tres —Illas Atlánticas, Lalín e Fornelos de Montes e Oia— observarase de xeito parcial.
Así o concretou o director de Turismo, Xosé Merelles, tras reunirse cos responsables dos nove destinos Starlight. No encontro puxo á súa disposición un espazo web centrado na eclipse que recompila información turística vinculada ao fenómeno astronómico. A páxina irá incorporando novos datos conforme se achegue o 12 de agosto.
Impacto no turismo
Merelles destacou as previsións de reservas de ocupación que baralla o Cluster de Turismo de Galicia que apuntan a un incremento significativo de visitantes internacionais e que fixeron que “moitas empresas receptivas leven tempo traballando”. “A coincidencia coa primeira quincena de agosto fai prever niveis de ocupación superiores ao 90% e 95%”, salientou.
Finalmente, o director de Turismo de Galicia lembrou que, co obxectivo de garantir unha observación segura e ordenada, a Xunta de Galicia constituíu unha comisión interdepartamental na que participan representantes das consellerías de Presidencia, Xustiza e Deportes; Medio Ambiente e Cambio Climático; Sanidade; Educación, Ciencia, Universidades e FP; así como Turismo de Galicia.
O traballo conxunto realizado permitirá anticipar e coordinar actuacións en materia de mobilidade, prevención de riscos, seguridade, protección civil e divulgación científica, entre outros ámbitos. Xosé Merelles subliñou que “a colaboración entre administracións será fundamental”.
Visible desde catro países
A eclipse terá lugar o vindeiro 12 de agosto e a fase de totalidade —momento no que a lúa oculta completamente o sol— só será visible desde catro países, entre eles España. Trátase dun fenómeno que non se produce na Península desde 1912, hai máis de 110 anos, e que non volverá repetirse con carácter total ata o ano 2180.
A franxa de totalidade atravesará o territorio galego desde Estaca de Bares, en Mañón, ata a comarca de Valdeorras, limítrofe con Castela e León, percorrendo áreas das catro provincias. En total, 143 concellos galegos —o 45,6% do total— situaranse na zona de observación privilexiada, abarcando o norte da provincia da Coruña, a práctica totalidade da provincia de Lugo, o nordeste da provincia de Ourense e áreas do interior de Pontevedra. No resto do territorio a eclipse poderá observarse de maneira parcial.
Segundo as previsións, o fenómeno comezará arredor das 19:31 horas e prolongarase ata as 21:23 horas, acadando o seu momento de máxima escuridade entre as 20:28 e as 20:30 horas, en función da localización.
