Corría o ano 1960. Betanzos, un enclave situado na costa noroeste galega, nas Rías Altas, alzábase como capital do lúpulo. O cultivo, xerme da cervexa, introduciuse na comunidade máis de 30 anos atrás, en 1927. Pero tras a época dourada, a súa recuperación comezou en 2004 e, en 2025, celebrouse a primeira edición da Festa do Lúpulo en Betanzos. Agora, esta iniciativa, promovida pola Deputación da Coruña a través de A paisaxe que sabe e pola Corporación Hijos de Rivera —empresa produtora da cervexa Estrella Galicia—, celebra por segundo ano consecutivo esta homenaxe ao lúpulo brigantino na fin de semana do 11 e 13 de setembro.
Música, gastronomía e cervexa serán os eixos arredor dos que xirarán as tres xornadas: showcookings, relatorios, catas e mesmo visitas aos campos de lúpulo. Entre elas, destacan os espectáculos gastronómicos de Iván Domínguez e A Artesa da Moza Crecha, e o concerto de Familia Caamagno. A deputada Avia Veira destacou no acto de presentación do evento que “cando un territorio ten unha historia tan importante coma a do lúpulo en Betanzos, o noso deber como administración é colaborar cos produtores, cos cociñeiros e cos músicos, porque cren nunha festa que é cultura, é economía e é identidade“.
Así, os asistentes poderán degustar de boa cervexa, acompañados de propostas gastronómicas interesantes con música en directo como banda sonora dunha experiencia única.
A colleita do lúpulo
Durante a mañá do sábado 12 de setembro, levaranse a cabo as visitas guiadas aos campos de lúpulo ás 11 e 12 horas. Esta é unha forma interactiva de coñecer o cultivo, unha planta que é tan robusta como delicada. Segundo informan na páxina web de Hijos de Rivera, a súa produción en Galicia tarda entre dous e tres anos en comezar a trepar con forza e producir as suficientes flores. Durante ese tempo, protéxense as plantas de pragas e enfermidades para garantir a súa prosperidade, a fin de que arraiguen e encaren o seu terceiro ano sas. Deste xeito, entre abril e maio asoman os primeiros brotes, selecciónanse os mellores e enróscanse de forma manual na trepas. Desta forma, a tradición galega arredor do lúpulo súmase á festa da cervexa cada ano.
Unha cervexa ligada á historia
En setembro de 2024, o presidente de Hijos de Rivera, Ignacio Rivera, anunciaba o novo lanzamento da empresa: Lupia, unha nova marca elaborada unicamente con lúpulo cultivado en Galicia. Limitada pola súa produción, as existencias desta cervexa dependen da cantidade de cultivo que se colleite cada tempada, unha labor que se realiza tradicionalmente nas dúas primeiras semanas de setembro.
A raíz deste produto, a empresa galega reivindica o pasado produtor do lúpulo en Betanzos, onde o cultivo comezou a recuperarse progresivamente hai 20 anos. Co obxectivo de protexelo, ao tratarse dunha planta gravemente ameazada pola emerxencia climática, decidiron impulsar o proxecto Ekonoke de cultivo de lúpulo hidropónico —en ambientes controlados— unindo tecnoloxía e coñecemento científico para dotar de resiliencia a unha especie tan representativa para Galicia.
Podes consultar o programa da Festa do Lúpulo de Betanzos 2026 na seguinte ligazón.
