A intervención arqueolóxica en Beira (Carral) ten por obxectivo localizar unha das foxas da violencia franquista que se deu neste lugar. O equipo, que arrincou o seu traballo esta semana, acaba de atopar restos óseos dun individuo. Segundo explican dende o grupo de investigación Histagra, que coordina a escavación dende a Universidade de Santiago (USC) e o Centro de Investigación Interuniversitario das Paisaxes Atlánticas Culturais (CISPAC), o achado encaixa coa descrición recollida no estudo histórico previo, aínda que será precisa a análise antropolóxica forense e o posterior estudo xenético para determinar a identidade da persoa en cuestión.
A intervención rematará o vindeiro venres 17 e constitúe unha primeira cata arqueolóxica que ten como obxectivo determinar a localización dunha das foxas da violencia franquista existentes en Beira. Sábese que entre agosto e setembro de 1936 foron enterradas en varios espazos da contorna da igrexa como mínimo 18 vítimas.
Ademais de Beira, grazas ao convenio asinado entre a USC e a Deputación da Coruña tamén se están a estudar as foxas de Serantes (Ferrol) e Boisaca (Santiago de Compostela). Un equipo multidisciplinar da USC encárgase de desenvolver a investigación baixo a coordinación científica de Lourenzo Fernández Prieto e Antonio Míguez Macho, de Histagra. Xurxo Antelo e Lucía Santiago, investigadores do mesmo grupo, ocúpanse da análise histórica. O estudo arqueolóxico é coordinado por José Carlos Sánchez Pardo, do grupo AEVUM, e conta coa empresa Tempos Arquéologos para o desenvolvemento dos traballos en campo. A análise de antropoloxía forense é coordinada polo investigador Edgard Camarós, membro do grupo GEPN-AAT.
No caso de Beira, o estudo histórico previo foi realizado por Xurxo Antelo e contou coa colaboración da asociación Cultura Aberta de Carral, que en 2023 inaugurou no cemiterio de Beira un monumento de homenaxe ás vítimas.
