Un equipo da USC e da UVigo crea unha maqueta virtual interactiva para imaxinar o futuro de Galicia

O proxecto do CISPAC crea unha paisaxe alternativa vertebrada en catro eixos temáticos: a comunidade, o hábitat, a enerxía e a alimentación

Como sería a Galicia máis desexable? Como se xestionaría a súa enerxía, os seus hábitats, a súa comunidade e os seus recursos alimentarios? Estas son as preguntas que trata de responder o Laboratorio de Imaxinación Utópica do Centro de Investigación Interuniversitario das Paisaxes Atlánticas Culturais (CISPAC) da Universidade de Santiago de Compostela (USC) a través dunha maqueta virtual interactiva. O proxecto, baseado na ciencia cidadá e na historia aplicada, imaxina unha Galicia alternativa. A iniciativa desenvolveuse ao abeiro das axudas para a investigación posdoutoral Xan de Forcados.

As persoas que visiten o web poderán viaxar por unha paisaxe interactiva vertebrada a partir de catro eixos temáticos —comunidade, hábitat, enerxía e alimentación—, que mostran distintas posibilidades para unha Galicia desexable. O dereito a unha vivenda accesible deseñada sobre o equilibrio entre o colectivo e o individual, a existencia de distribuidoras locais de enerxía renovable, a aposta polos comedores comunitarios, a atención aos coidados ou o artellamento doutro modelo de transporte son algúns dos elementos presentes na maqueta.

Publicidade

A través desta representación virtual, o Laboratorio de Imaxinación Utópica pretende ofrecer unha ferramenta aberta ao conxunto da sociedade que facilite a discusión colectiva arredor do futuro do territorio, e que mesmo poida inspirar a organizacións e comunidades locais para a súa implementación.

Unha unión interdisciplinaria

Promovido por un equipo interdisciplinario integrado por persoal investigador USC e da Universidade de Vigo —Luis Toledo Machado (USC, coordinador), Almudena Fiunte Blanco (UVigo), David Fontán Bestilleiro (USC), Antonio Giráldez Blanco (USC) e Noortje Keurhorst (UVigo)— o laboratorio contou coa participación de preto de 20 representantes de distintas entidades con experiencia na xestión e na investigación arredor do territorio (comunidades de montes, comunidades enerxéticas, grupos de vivenda, asociacións locais…). 

Este proceso de cocreación deu lugar a un obradoiro no cal, a partir da reflexión sobre a historia das utopías, puxéronse en común os desafíos e arelas do presente. Finalmente, a discusión colectiva derivou na realización da maqueta virtual, así como dun fanzine artístico accesible tamén na web. Ademais, a partir da análise do proceso e dos resultados, o equipo investigador está a preparar un documento resumo de políticas que poderá ser utilizado polas distintas administracións.

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

A provincia da Coruña lidera as emisións galegas de gases de efecto invernadoiro cun 47,4% do total

Un informe do Observatorio Galego da Acción Climática revela o impacto das industrias enerxéticas fósiles no norte da comunidade

Un epistolario inédito revela a rede feminista entre Galicia e Cataluña de principios do século XX

As cartas autógrafas que Micaela Chao Maciñeira enviou en galego á pedagoga catalá Francesca Bonnemaison permiten recuperar unha figura clave do feminismo

Nin se ve, nin se cheira, nin se nota: a ameaza silenciosa do radon

As concentracións dependen do lugar onde se atopa a vivenda, a ventilación, as características do edificio e os hábitos dos seus ocupantes. Por Diana Rodríguez Rodríguez

Os segredos dos 21.000 pelos: un estudo revela a través do ADN o comportamento social do oso pardo

A tese de Esther Valderrábano confirma o bo estado sanitario da poboación cantábrica, que conta con arredor de 400 exemplares