Aínda faltan catorce anos para chegar a 2039, pero as previsións das institucións permiten anticipar como será a evolución das nosas cidades. Do mesmo xeito que podemos mirar cara ao pasado, tamén podemos tentar comprender o futuro. O Instituto Galego de Estatística (IGE) elabora cada dous anos a operación Proxeccións de Fogares, que ofrece unha estimación da evolución futura dos fogares galegos a partir das condicións demográficas actuais.
Estes estudos permiten coñecer aspectos como o número, tamaño e composición dos fogares, e teñen unha incidencia directa noutros traballos derivados. Por exemplo, son unha ferramenta clave para a toma de decisións nas políticas públicas de planificación territorial e social.
A operación, vinculada tamén ao Censo de poboación e vivendas de 2021 do Instituto Nacional de Estatística (INE), amosa un crecemento do número de fogares entre 2024 e 2039, cun aumento de 65.623 unidades, o que supón unha variación relativa do 5,9%. Deste modo, Galicia alcanzará os 1.168.864 fogares no ano 2039.
O maior número de fogares concentrarase na provincia da Coruña, con 493.258, seguida de Pontevedra. Con todo, esta última será a que medre máis rápido en proporción ao seu tamaño inicial: pasará de 369.058 a 398.333 fogares, o que representa unha taxa de variación do 7,9%. Pola súa parte, Ourense e Lugo manteranse arredor dos 138.000 fogares, aínda que o crecemento será lixeiramente superior en Ourense. En Lugo, a variación será a máis baixa de Galicia, cun 1,6%.
Onde haberá máis fogares?
Das vinte áreas de Galicia nas que se organiza Galicia, que agrupan as distintas comarcas, o número de fogares aumentará en quince delas no período comprendido entre 2024 e 2039.
A área da Coruña será a que experimento o maior crecemento, cun incremento do 12,2% segundo as previsións. Na mesma provincia, a área de Santiago tamén amosará un avance notable, cun 10,6% máis de fogares. Séguenas as áreas de Vigo (9,4%) e Caldas-O Salnés (8,4%), que tamén destacarán polo seu dinamismo.
Porén, o maior decrecemento tamén se concentrará na provincia da Coruña: a Costa da Morte perderá un 3,5% dos fogares, pasando de 52.614 a 50.796. O mesmo observarase no Lugo oriental, que descenderá de 14.867 a 14.346 fogares. Tamén se prevé unha diminución na área de Ourense sur, cunha caída do 2,6% ao longo do período analizado.
De portas cara a dentro
En 2039, o tamaño medio dos fogares situarase entre unha e dúas persoas, con porcentaxes de 29,5% e 29,7%, respectivamente. En conxunto, estas dúas tipoloxías representarán máis da metade dos fogares galegos. Na maioría dos casos, a estrutura estará formada por vivendas unipersoais, seguidas das parellas con fillos. Ademais, haberá 247.702 fogares compostos por parellas sen fillos e 109.866 unidades monoparentais.
Esta situación contrasta coa realidade do ano 2024, cando a tipoloxía máis habitual é a das parellas con fillos, seguida das vivendas unipersoais. A tendencia, polo tanto, apunta cara a fogares de menor tamaño e con menos descendencia.
Con todo, estas estruturas varían segundo a provincia. Mentres que na Coruña, Lugo e Ourense predominarán os fogares unipersoais, en Pontevedra serán máis frecuentes as parellas con fillos. Esta evolución non só amosa como cambiarán as cidades galegas, senón tamén como se transforma a nosa sociedade.
