A Axencia Española de Meteoroloxía (AEMET) nomeou o novo ciclón extratropical que se aproxima a Galicia: a borrasca Claudia, que manterá activa a alerta laranxa. Esta depresión provocará ventos fortes e precipitacións intensas nas illas Canarias, e chegará a Galicia con refachos de vento significativos, chuvias persistentes e temporal marítimo. Segundo elTiempo.es, a actividade principal alcanzará o territorio o martes pola noite, cando a primeira das frontes máis activas chegue á comunidade.
Así, Galicia volverá ser o foco das borrascas atlánticas. A pesar de que o fenómeno afectará a todo o noroeste peninsular, prevese que as acumulacións máis importantes se rexistren no oeste da rexión. Segundo informa MeteoGalicia vía X, a borrasca manterase estacionaria ao noroeste.
O luns 10 de novembro estará caracterizado por ceos parcialmente nubrados e chuvascos. Con todo, a alerta laranxa activará ventos fortes do sur e ondas superiores aos cinco metros na zona oeste. As partir do mércores, agárdanse chuvias localmente intensas.
Alerta laranxa por vento e mar
MeteoGalicia activa alertas laranxas por vento e ondas para o martes e o mércores. O martes 11 de novembro, as zonas máis afectadas serán o mar da Costa da Morte e o das Rías Baixas.
A incidencia do vento intesificarase a partir do mércores, estendéndose a alerta laranxa aos concellos do oeste da Coruña. Os ventos, previstos entre as 00:00 e as 3:00 horas, poderán superar os 100 km/h. Nesta xornada, o mar de vento na Costa da Morte alcanzará forza 8.
Mentres, as provincias de Pontevedra e A Coruña, A Mariña lucense, e as montañas de Lugo e Ourense estarán en alerta amarela, principalmente por ventos que poderán superar os 80 km/h en zonas como as montañas ourensás e lucenses, e no noroeste da Coruña.
