Novembro comeza cunha mala nova: a partir do martes chega unha masa de aire de orixe polar continental a Galicia, procedente do interior de Europa, que provocará un descenso xeralizado das temperaturas. A explicación está detrás das altas presións situadas ao norte, que favorecen esta situación meteorolóxica. Os termómetros baixarán dende os 20°C ata os 15°C nas cidades principais da comunidade, cinco graos determinantes para pasar de temperaturas moderadas a frías.
Ademais da caída térmica, súmase a alerta amarela por mar de vento para o martes 3 de novembro, localizado ao oeste e noroeste da Coruña, con refachos de forza 7, acusados entre Ferrol e Bares. Así, a pesar de que o tempo será seco, as sospeitas de chuvia levántanse a partir do venres. MeteoGalicia recolle probabilidades de ocorrencia de chuvia ata o xoves do 5% nas principais cidades da Coruña, con ceos onde predominarán o sol e as nubes, pero haberá que agardar ata que o servizo galego de meteoroloxía publique os prognósticos dos vindeiros días.
