Unha tese doutoral desenvolvida no Instituto Español de Oceanografía (IEO-CSIC) centrouse no cultivo de dinoflaxelados do xénero Dinophysis, responsables dos episodios tóxicos diarreicos que producen a maior parte dos peches por toxinas en Galicia, para achegar metodoloxías útiles para a prevención e mellor comprensión das súas proliferacións nas rías galegas. Para iso, estudáronse distintos aspectos da bioloxía destas microalgas tóxicas, que inclúen desde o seu cultivo en laboratorio ata a investigación sobre os factores ambientais que condicionan o seu desenvolvemento no medio natural.
A investigación permitiu optimizar as técnicas de cultivo de Dinophysis acuminata e D. acuta, dúas das especies tóxicas máis relevantes das costas galegas, así como da súa presa, o ciliado Mesodinium rubrum. “Dispoñer de cultivos máis estables permite estudar mellor a súa fisioloxía, a súa capacidade de producir toxinas e os factores que favorecen a aparición de proliferacións nocivas”, sinala Pilar Rial, investigadora do Centro Oceanográfico de Vigo do IEO e autora da tese.
Ademais, a investigación analiza o comportamento no laboratorio de distintas especies de Dinophysis fronte a cambios bruscos de temperatura e salinidade, usando rangos similares aos que ocorren nas rías galegas. Os resultados mostran que cada especie presenta tolerancias e preferencias ambientais diferentes, o que axuda a explicar os seus patróns de distribución e proliferación na natureza.
Estes avances proporcionan información para mellorar a comprensión e capacidade de predición das floracións tóxicas, dos seus efectos sobre os ecosistemas mariños e os recursos de interese comercial, contribuíndo ao coñecemento necesario para o desenvolvemento de ferramentas que axuden a minimizar o seu impacto.
