A innovación no ámbito da alimentación pode pasar máis desapercibida. Quizais, hai persoas que pensan que non hai transformacións importantes que facer. Nada máis lonxe da realidade. Empresas e grupos de todo o mundo loitan por facer produtos máis sostibles, máis saudables e que sexan rendibles. Xuntar todas estas variables é complicado, pero un desafío aínda maior é que as innovacións realizadas realmente se traduzan en produtos. En moitas ocasións, porque nin sequera hai esa oportunidade entre os propios actores. Net4Food cambia todo iso cun investimento na colaboración e na transferencia de coñecemento entre Galicia e o norte de Portugal para trasladar á vida real as investigacións de empresas e organismos do sector. A I Conferencia Internacional FoodTec foi un paso decisivo no avance neste senso.
“É fundamental crear máis espazos de conversa e colaboración entre investigadores e empresas para favorecer a innovación no sector alimentario”, recalca Helena Jamardo, técnica de proxectos da Área de Innovación, Transformación Dixital e Emprendemento do Clúster Alimentario de Galicia (Clusaga). Ademais, Jamardo explica que a sociedade ten unhas necesidades máis esixentes, polo que conferencias como estas son clave para conseguir esa transferencia de coñecemento. O evento realizouse en Bragança, Portugal, e seguiu o lema Shaping the Future of Sustainable Food Ecosystems (Moldeando o futuro dos ecosistemas alimentarios sostibles).
Relatores de prestixio
“É importante coñecer modelos similares xa feitos noutros países e saber os seus efectos e aplicacións para tomalos de referencia na nosa eurorrexión”, destaca sobre o evento no que Jamardo participou como relatora. A conferencia tamén contou coa participación de expertos do sector como Veronica Lattanzio, química especialista en saúde alimentaria, Rui Costa Lima, especialista en ciencia sensorial e con máis de 25 anos de experiencia no sector e Manuel Vázquez, catedrático en Tecnoloxía de Alimentos pola Universidade de Santiago (USC).
Ademais, tamén asistiron outros actores vinculados ao sector e á investigación. É o caso de Manuel Reigosa, reitor da Universidade de Vigo, Isabel Ferreira, exsecretaria de Estado para o Desenvolvemento Interior e Rexional en Portugal e Carlos das Neves, científico xefe da Autoridade Europea de Seguridade Alimentaria (EFSA), unha axencia con funcionamento na Unión Europea, Islandia, Liechtenstein, Suíza e Noruega.
A rede Net4Food
Entre todas estas entidades e empresas de diversos tipos, estiveron varios pertencentes á rede Net4Food. É o caso por exemplo de empresas centradas na investigación no sector como o grupo Néboda Farms, que regula o ecosistema a través da temperatura, a iluminación, o rego, os nutrientes que reciben e o dióxido de carbono, o que permite maximizar a eficiencia de forma sostible. Un traballo con moito foco na investigación como o que fai Proenol, que busca mellorar os procesos de vinificación a partir de extraer e producir proteínas de lévedo. É algo moi importante para poder crear produtos veganos de calidade, por exemplo. No caso de Landratech están guiados por unha visión de bioeconomía circular que conecta a varios actores para crear ingredientes de alto valor derivados das landras e doutras especies autóctonas.
Da rede tamén forman parte empresas tradicionais, como Pão de Gimonde, que é de prestixio internacional, ou Cuevas e Cía, recoñecidos pola creación de produtos como o marrón glacé desde 1867. Tamén a Casa Mendes Gonçalves, centrado na produción e comercialización de vinagres, condimentos e outros produtos.
Moitas empresas que foron conectadas con outros socios clave que tamén xogan un papel na innovación alimentaria. É o caso do Instituto Politécnico de Bragança, o Laboratorio Internacional Ibérico de Nanotecnoloxía, Portugal Foods, More Colab, Aquavalor a Universidade de Vigo e Clusaga. Este último forma parte da rede Net4Food e é un peso pesado no sector con máis de 200 entidades adscritas. Ademais, é un actor fundamental para que as investigacións cheguen aos produtos finais.
Transferencia de coñecemento
A presenza de espazos coma este favorece a aplicación da potente investigación en España e, concretamente, en Galicia, en temáticas de alimentación e nutrición. Ademais, é un sector que crea de forma directa e indirecta miles de traballos e que forma parte dun dos valores principais da comunidade: a súa gastronomía.
A dificultade desta situación é a falta de linguaxe común, recorda Jamardo. E é que as empresas intentan responder a unha demanda de forma rendible e rápida mentres que as investigacións tenden a ser longas e requiren de diversas probas. Por iso, Net4Food é fundamental para realizar eventos como a Conferencia FoodTec que canalizan esa transferencia de coñecemento. A rede actúa como coordinador e planificador destes eventos, dende a loxística, a preparación dos programas, traer os relatores, identificar o perfil dos asistentes e definir as liñas temáticas a tratar no evento.
Iberian FoodTec Lab
Net4Food xa acadou varios éxitos ata o de agora. Por exemplo, a elaboración dun plan de boas prácticas, a creación de grupos de traballo especializados, o desenvolvemento de seminarios de intercambio e a celebración do I Congreso Interfood. Todos son elementos fundamentais para a creación desa conexión entre os distintos actores do sector. “Ademais, realizouse un diagnóstico completo do sector, identificando capacidades, necesidades e oportunidades comúns”, explica Jamardo.
O evento que se realizou do 27 ao 29 de outubro é un dos últimos pasos antes da creación do Iberian FoodTec Lab. Este pretende ser un laboratorio de excelencia no eido da innovación alimentaria. Jamardo tamén afirma que permitirá poñer en contacto os diferentes actores do sector para favorecer sinerxías, crear colaboracións, proxectos e a transferencia de coñecemento a favor do avance alimentario.
O compromiso das diversas entidades do sector fai que a Iberian FoodTec Lab se poida establecer como un actor fundamental para a sostibilidade, a rendibilidade e a innovación. Un punto de encontro e de unión para as entidades galegas e portuguesas que, combinado coa súa cultura gastronómica, pode situarse como unha referencia alimentaria en todo o mundo.
