O Foro de Empresas Innovadoras (FEI) recoñeceu a Unirisco Galicia “pola súa traxectoria ao servizo da innovación e a transferencia de coñecemento”, como indicou o xurado.
Inmaculada Rodríguez Cuervo, directora xeral de Unirisco, subliñou que este galardón pertence ás universidades galegas que hai 25 anos “tiveron a visión de apostar por un modelo de transferencia pioneiro en España” e aos socios que apoian Unirisco, “empresas do tecido produtivo galego comprometidas co investimento en ciencia e tecnoloxía, que contribúen a crear empresas e emprego cualificado, impulsando o desenvolvemento económico de Galicia”.
Cultura de transferencia
Unirisco foi a primeira sociedade de capital risco vinculada ás universidades e autorizada pola CNMV, en 2001, cun modelo deseñado para acompañar a transformación de resultados de investigación e coñecemento científico en proxectos empresariais.
“Hai 25 anos, cando Unirisco falaba de investimento privado en spin-offs universitarias era moito menos habitual do que é hoxe. Contribuír a construír esa cultura de transferencia é probablemente un dos nosos maiores logros”, destacou Inmaculada Rodríguez Cuervo.
Unirisco apoiou a creación de máis de 40 proxectos empresariais en ámbitos como biotecnoloxía e saúde, tecnoloxías dixitais, medioambiente, dixitalización industrial ou novos materiais, cun volume de facturación de 40 millóns de euros, que suman máis de 500 empregos e que crearon máis de 150 patentes.
“Actuamos como primeiro capital privado no que a ciencia deixa de ser ciencia para converterse nun produto ou servizo. Somos o capital paciente (investimento mínimo de 3-5 anos) que non cobren os fondos públicos nin o capital risco convencional que, entre outras garantías, necesita que exista unha facturación recorrente”, destacou.
Recoñecemento nacional á innovación
Unirisco recollerá este recoñecemento o próximo 20 de outubro en CaixaForum Madrid, no marco da XIV edición dos Recoñecementos FEI. En anteriores edicións, tamén foron premiadas entidades de referencia como o CDTI, ENISA, o Barcelona Supercomputing Center, a Federación Española de Centros Tecnolóxicos (FEDIT), o Instituto de Ciencias Fotónicas (ICFO) ou, en 2023, a Axencia Galega de Innovación (GAIN).
O Foro de Empresas Innovadoras traballa dende hai máis de dúas décadas para fortalecer o ecosistema de innovación en España, promovendo a colaboración entre empresas, universidades, centros de investigación, profesionais e administracións públicas.
