Un sismo de magnitude 4,2 con orixe no municipio de Benuza (provincia de León) —a menos de 30 quilómetros da poboación galega de Sobradelo— sentiuse en diversos puntos de Galicia. Tan só o oeste da provincia coruñesa pareceu quedar fóra do alcance do terremoto. Segundo o Instituto Xeográfico Nacional (IGN), a sacudida produciuse o xoves 15 de outubro ás 22:34:45 horas. Nos límites galegos, a parte máis intensa do movemento percibiuse nos territorios de Lugo e Ourense, en especial na zona do Barco de Valdeorras, a máis próxima ao epicentro.
O terremoto entrou polo leste da comunidade galega e estendeuse pola meirande parte do territorio. Cara ao norte, o sismo rexistrouse ata o municipio de Negradas (O Vicedo, Lugo), Ribadeo, tamén nos límites lucenses e a costa norte da Coruña. Polo oeste, as poboacións de Carballo e Noia, ambas na Coruña, marcaron o fin do alcance da sacudida. No sur, o sismo estendeuse ata Berrande e Queizás (en Ourense) e Tui (en Pontevedra).
Unha magnitude de 4,2 indica un terremoto lixeiro que provoca movementos nos obxectos dentro das vivendas, pero non se consideran sacudidas perigosas.
Podes consultar os datos do Instituto Xeográfico Nacional (IGN) nesta ligazón.
