Quen era Henrietta Lacks? Xa estamos a vivir un apartheid climático? Existe o ADN galego? Estas e moitas outras preguntas resolveranse este sábado 29 de novembro na xornada Pontevedra multicultural: ciencia
pola igualdade. O encontro, que se celebrará no centro social O Gorgullón a partir das 10.30 horas, está organizado por GCiencia en colaboración coa Concellería de Igualdade do Concello de Pontevedra co gallo do 25N. O obxectivo é analizar dende unha perspectiva crítica os nesgos de raza e xénero ao longo da historia da ciencia, no presente e, tamén, que cabe esperar de cara ao futuro.
Da man da ciencia, as relatoras e relatores identificarán nesgos de xénero ou discriminacións raciais en, por exemplo, experimentos médicos ou avaliacións científicas do pasado, que hoxe en día se reproducen na intelixencia artificial. E tamén evidencias sólidas de que o concepto de “raza” carece de base biolóxica ou que todas as poboacións do planeta están conectadas e que a diversidade é parte esencial da nosa historia. Tamén, como as migracións climáticas están a fomentar os discursos de odio, o aumento de mensaxes xenófobos e racistas en redes sociais e o porqué de sucesos como o de Torre Pacheco.
Un espazo para a reflexión crítica
O encontro no Gorgullón pretende ser un espazo de reflexión crítica, informada e plural, arredor da multiculturalidade, o feminismo e o racismo e os retos da convivencia global, a través duns relatorios-debate que conxugan rigor académico, compromiso social e divulgación accesible. Para iso contarase coa participación do xenetista Antonio Salas, que abordará os nesgos raciais e de xénero dende o estudo do ADN. Tamén colaboran as profesoras da Universidade da Coruña (UDC) Laura Castro e Keina Espiñeira, o investigador da Universidade de Santiago (USC) Ignacio Varela Ramos e a bióloga África Iglesias.
Pontevedra é unha cidade referente, non só polo seu modelo urbano, senón tamén na aposta pola educación, igualdade, ciencia e dereitos humanos. Unha aposta poliédrica reflectida na xornada Pontevedra multicultural: ciencia pola igualdade.
Programa
10.15 horas. Inauguración.
10.30 horas. De Henrietta Lacks á IA: os múltiples nesgos na ciencia
- África Iglesias, bióloga
- Laura Castro, profesora da área de Ciencia da computación e intelixencia artificial da Universidade da Coruña (UDC)
11.30 horas. O impacto das migracións climáticas nos discursos racistas
- Keina Espiñeira González, profesora na Facultade de Socioloxía da UDC
- Ignacio Varela Ramos, xeógrafo e investigador do Centro de investigación interuniversitario das Paisaxes Atlánticas Culturais (CISPAC)
12.30 horas. Unha ollada dende a xenética: existe o ADN galego?
- Antonio Salas Ellacuriaga, xenetista e catedrático de Medicina na Universidade de Santiago (USC). Lidera o lidera o grupo de investigación Xenética de Poboacións en Biomedicina do Instituto de Investigación Sanitaria de Santiago (IDIS).
