Galicia prepárase xa para dar a benvida á eclipse total de Sol do 12 de agosto, un evento astronómico excepcional que poderá observarse dende boa parte da comunidade. Trátase, ademais, do primeiro territorio en España onde se verá como a Lúa oculta por completo o Sol. Co obxectivo de facilitar a planificación do momento e do lugar ideais para a súa observación, Turismo de Galicia puxo en marcha unha páxina web específica dedicada a este fenómeno. Nela recóllese información práctica, ligazóns oficiais e recursos útiles para a cidadanía.
En Galicia, a eclipse poderá verse como total nunha franxa concreta. As provincias de Lugo e A Coruña serán as máis favorecidas, cunha maior presenza dentro da franxa de totalidade. Especialmente o nordeste da comunidade concentrará as zonas que quedarán mergulladas nunha escuridade máis intensa durante o fenómeno. A iniciativa da Xunta, ademais de explicar en que consiste esta eclipse que terá lugar en pleno verán, inclúe un mapa interactivo que permite comprobar se cada concello se atopa dentro da franxa de totalidade, así como consultar os horarios específicos.
O concello de Mañón (A Coruña) será o que máis tempo permaneza en totalidade, cun minuto e 47 segundos, acadando o seu máximo ás 20:27:31 horas do 12 de agosto. A eclipse comezará arredor das 19:30 e rematará cara ás 21:21, polo que o proceso abrangue moito máis ca o momento de escuridade total. Cómpre ter en conta que, no momento máximo, o Sol estará moi baixo sobre o horizonte oeste, polo que será recomendable escoller un lugar con boa visibilidade nesa dirección. A maior parte dos recursos incluídos na páxina de Turismo proceden do Instituto Xeográfico Nacional (IGN), garantindo así información rigorosa e precisa.
Por que a totalidade entra por Galicia?
A franxa de totalidade dunha eclipse solar é moi estreita: só nos lugares polos que pasa a sombra da Lúa pode observarse a ocultación completa do Sol. No caso de 2026, esa traxectoria atravesa o noroeste da Península Ibérica e abrangue boa parte de Galicia.
Deste xeito, pódense distinguir dúas situacións. Por unha banda, os concellos situados dentro da franxa de totalidade, onde as persoas observadoras poderán retirar os lentes de protección unicamente durante os segundos ou minutos que dure a totalidade —segundo a localización—. Pola outra, os territorios que quedan fóra desa franxa, onde a eclipse será parcial: o Sol aparecerá “mordido”, pero en ningún momento chegará a cubrirse por completo.
O IGN elaborou láminas resumo para as capitais de provincia, que funcionan como guía cos principais datos estimados do fenómeno. Todo este material está tamén recompilado e dispoñible na páxina web de Turismo de Galicia.
Horario estimado da eclipse total de Sol na cidade de Lugo. Foto: IGN vía Turismo de Galicia Horario estimado da eclipse total de Sol na cidade da Coruña. Foto: IGN vía Turismo de Galicia Horario estimado da eclipse total de Sol na cidade de Ourense. Foto: IGN vía Turismo de Galicia Horario estimado da eclipse total de Sol na cidade de Pontevedra. Foto: IGN vía Turismo de Galicia
Horarios anticipados
Turismo de Galicia permite consultar os horarios estimados da eclipse segundo a túa localización a través do seu visualizador oficial. Cómpre ter en conta que, ao celebrarse en agosto, Galicia está en horario de verán, polo que as horas oficiais poden non coincidir exactamente coa posta de sol real, especialmente en lugares onde o horizonte non sexa completamente plano.
Para gozar dunha boa observación, recoméndase escoller localizacións que cumpran algunhas condicións básicas: un horizonte oeste despexado, espazos amplos e seguros —como miradoiros, áreas recreativas ou praias abertas cara ao oeste—, chegar con suficiente antelación para evitar imprevistos e, por suposto, comprobar previamente se o teu concello se atopa dentro da franxa de totalidade.
Primar a seguridade
Nun fenómeno como unha eclipse solar, a emoción nunca debe ir por diante da seguridade. Protexer a vista é fundamental: mirar ao Sol sen a protección axeitada pode provocar danos oculares graves e permanentes. Por iso, hai prácticas que deben evitarse en todo momento: non mirar directamente ao Sol (nin sequera con nubes ou cando parece débil), non empregar lentes de sol convencionais e tampouco recorrer a “trucos” caseiros como cristais afumados, radiografías, CDs ou espellos. Do mesmo xeito, nunca se deben utilizar cámaras, prismáticos ou telescopios sen filtros solares homologados.
Para observar a eclipse con seguridade, é imprescindible ar ar, adquiridas en distribuidores de confianza e en bo estado (sen rabuñaduras nin perforacións). No caso de empregar instrumentos ópticos, deben levar filtros solares adecuados colocados diante do obxectivo. Tamén existen métodos de observación indirecta, como a cámara estenopeica (un pequeno burato nun cartón), a proxección da imaxe con prismáticos ou telescopios sobre unha pantalla —reservada a persoas con experiencia— ou o seguimento mediante retransmisións oficiais en streaming.
Cómpre diferenciar entre as fases parciais e a totalidade. Durante todas as fases parciais, mesmo cando só queda unha pequena parte do Sol visible, o uso de protección é obrigatorio. Só nos breves minutos de totalidade completa é seguro observar a eclipse a simple vista sen lentes. En canto reaparece o primeiro brillo do Sol, débese volver empregar protección inmediatamente. Isto só é válido nas zonas situadas dentro da franxa de totalidade; nas áreas onde a eclipse sexa parcial, non se debe retirar a protección en ningún momento.
Podes consultar a páxina web de Turismo de Galicia na seguinte ligazón.
