Tes un ben cultural ao lado da casa? Este mapa interactivo de Galicia permíteche descubrilo

A quen non lle gusta descubrir onde se agocha o patrimonio galego, e facelo ademais nun catálogo visual e unificado? Isto xa é posible grazas á nova aplicación da organización Patrimonio Galego, creada co obxectivo de elaborar un Catálogo Social do legado cultural, que xa reúne 75.709 bens no seu repositorio. A app foi desenvolvida polo divulgador cultural Manuel Gago, e permite consultar e interpretar o territorio directamente dende a comodidade do móbil.

Pero o catálogo non se constrúe só: a ciencia cidadá tamén xoga un papel fundamental, xa que calquera persoa pode engadir bens das súas aldeas a través da web de Patrimonio Galego. A aplicación incorpora, ademais, 12.403 fichas informativas e 521.499 topónimos. A través dun mapa interactivo, é posible explorar facilmente todos os elementos rexistrados ao longo do territorio.

Publicidade

Coa recente actualización do 3 de decembro, a ferramenta dá un salto adiante: integra imaxes do voo fotogramétrico de 1956, mellora a visualización do terreo mediante sombreados, ofrece previsión meteorolóxica para cada ben nas vindeiras 24 horas, vincula as fichas da Xunta coa documentación e permite compartir facilmente as localizacións. Pero, que podemos atopar exactamente?

Máis de 40 categorías

Na aplicación do Patrimonio Galego non só atoparemos ermidas, pontes ou petróglifos. O catálogo abrangue máis de corenta categorías distintas. Un exemplo é a categoría “Camposanto”, que reúne 34 resultados. Entre eles está o Cemiterio dos Ingleses, situado no concello de Camariñas e datado do século XIX. A ficha inclúe información sobre o tipo de ben, a súa localización, a cronoloxía e unha breve descrición. Indícase, por exemplo, que neste enclave costeiro recibiron sepultura 172 das 175 persoas que viaxaban a bordo do cruceiro-torpedeiro ‘Serpent’.

Publicidade

As fichas tamén detallan aspectos como a propiedade, o uso actual ou a categoría do ben, ademais de información práctica que non aparece noutros rexistros: Ten camiño de acceso? Está cuberto de maleza? Algunha obra? Estado de conservación?

Este catálogo social reúne unha enorme diversidade de bens: cascos históricos, calvarios, cuarteis, eiras, industrias, institucións culturais e políticas, e mesmo lavadoiros. Un exemplo é a coñecida Fonte de Sobreviñas, no concello de Noia, un conxunto etnográfico formado pola fonte e un lavadoiro anexo, aínda que a súa categoría non está definida.

Outro caso singular é o dos reloxos de sol, que se concentran maioritariamente na provincia de Ourense. Un dos rexistrados é o Reloxo de Sol de Tixós (Baltar, Santa María de Tixós), datado do século XX: un reloxo colocado no cumio dunha vivenda privada, erguido sobre un podio en forma de cálice, cos números distribuídos en semicírculo e rematado cun pináculo. Este ben, por exemplo, non figura no inventario oficial, polo que a aplicación contribúe a reunir e facer visible un patrimonio disperso e, en moitos casos, descoñecido.

Podes consultar a aplicación de Patrimonio Galego na seguinte ligazón.