A dous días de comezar a ponte de decembro, a situación meteorolóxica mantén en alerta laranxa boa parte da costa galega. Polo de agora, MeteoGalicia activa este aviso para os días 4 e 5 de decembro. Durante esta xornada agárdanse chuvascos intermitentes, nalgúns momentos máis intensos e persistentes no norte da Coruña e Lugo, e máis ocasionais no sur, tal e como explica David Domínguez, da conta de X @RedmeteoP.
Con todo, MeteoGalicia sinala no seu perfil de X que a partir do venres a circulación do suroeste traerá unha masa de aire máis cálida e húmida. Esta previsión tamén é coincidente coa información que lanza Roberto Granda en ElTiempo.es, que indica que pasaremos dun frío propio do inverno meteorolóxico a un ambiente moito máis suave.
Así, aínda que hoxe as temperaturas se manterán frescas, o venres está previsto un ascenso case xeralizado. En Galicia, as mínimas poderán subir entre 3ºC e 6ºC, chegando puntualmente ata os 8ºC. O sábado podería ser o día máis cálido da ponte: A Coruña mesmo podería alcanzar os 19ºC.
A costa norte galega
As alertas laranxas abranguen o litoral dende a Costa da Morte ata a Mariña lucense, con ondas que poden chegar aos seis metros dende o xoves ata o domingo. A alerta laranxa remata aí, pero non así as advertencias: mantéñense alertas amarelas por vento oeste de forza 7, que incluso poden acadar forza 8 nalgúns puntos do noroeste da provincia da Coruña. Ademais, o tempo deste xoves 4 de decembro tamén afectará ás Rías Baixas, onde se activa unha alerta de menor intensidade por ondas de entre 4 e 5 metros.
A medida que se achega a fin de semana, a área afectada polas alertas medra, aínda que a cor laranxa se concentra na costa norte e a amarela se estende cara ao interior. Prevese que a provincia de Pontevedra acumule máis de 40 litros por metro cadrado en 24 horas, situación que se repetirá no sur de Ourense. En terra, na Mariña agárdanse refachos de vento que superarán os 80 quilómetros por hora nas zonas máis elevadas da comarca.
En definitiva, as borrascas continuarán sobre Galicia, deixando ventos fortes e mar moi adverso nunha fin de semana esperada por moitos para o descanso, pero que estará marcada pola chuvia.
