A Xunta facilita o acceso ao fármaco Lenzetto mediante a fórmula de acceso ao “medicamento estranxeiro”, tras rexistrarse o desabastecemento deste fármaco no mercado español. Así o anunciou Luis León, xerente do Servizo Galego de Saúde, unha incidencia que está a ser xestionada pola Axencia Española de Medicamentos e Produtos Sanitarios (AEMPS). Así, as pacientes galegas contan na actualidade con dúas vías principais para non ter que suspender o seu tratamento: o procedemento de medicamento estranxeiro e as alternativas do medicamento.
A través da colaboración entre o Servizo Galego de Saúde e as catro Delegacións Territoriais da Consellería de Sanidade, é posible tramitar unha solicitude para que Lenzetto sexa subministrado desde o estranxeiro. Así, ata o pasado 2 de novembro o departamento sanitario da Xunta xestionou as solicitudes de Lenzetto ao estranxeiro dun total de 84 pacientes galegas —50 da Coruña, 18 de Pontevedra, 10 de Ourense e 6 de Lugo—.
A segunda das posibilidades é o acceso ao tratamento Evopad, unha alternativa terapéutica transdérmica que tamén está financiada polo sistema nacional de saúde, a pesar de que tamén estivo baixo réxime de escaseza dende o 16 de marzo ata outubro. A AEMPS prevé a volta de Lenzetto ao mercado durante a segunda quincena de novembro, o que posibilitará avanzar nunha recuperación progresiva da saa subministración.
