As cifras non enganan: a vaga de incendios que asola Galicia está a ser a máis devastadora da última década. No 2025 podería proclamarse tamén como a maior onda de lumes de Europa, pois só o foco de Larouco supera en magnitude aos incendios que arrasaron o macizo de Cobières, en Francia, o pasado 5 de agosto. Nese episodio arderon arredor de 17.000 hectáreas, mentres que o lume ourensán supera xa as 20.000.
Pola súa gravidade ambiental e social, numerosos medios, tanto europeos como internacionais, están a facerse eco da traxedia, dando visibilidade a este desastre con escasos precedentes e alertando sobre o impacto ecolóxico e humano que supoñen os sete focos que seguen activos en Ourense.
As análises chegan dende a prensa francesa, con artigos en Le Monde, ata o seguimento do británico The Guardian. Tampouco falta a solidariedade dos medios portugueses, que tamén están a sufrir os seus propios incendios forestais e publican reportaxes en cabeceiras como Público e Diário de Notícias, salientando a dimensión compartida desta emerxencia na península ibérica.
Galicia nos tres grandes de Europa
A magnitude da catástrofe incendiaria que se vive en Galicia é tal que tres dos xornais máis influentes de Europa decidiron levar a información ás súas portadas. Le Monde, The Guardian e Frankfurter Allgemeine publicaron artigos que reflicten a dura realidade que atravesa a terra galega nestes días.
O diario británico The Guardian está a ofrecer unha cobertura centrada no fenómeno global dos incendios forestais. O pasado 14 de agosto recolleu as declaracións da ministra de Medio Ambiente, Sara Aaegesen, quen advertía de que esta vaga de lumes constitúe unha emerxencia climática evidente. Porén, a Galicia só lle dedican un breve parágrafo e unha imaxe de Chandrexa de Queixa, xa que o enfoque principal é o impacto mundial. Destaca a comparación de que as 158.000 hectáreas queimadas en España no momento da publicación equivalen a unha área aproximadamente tan grande como a zona metropolitana de Londres.
Pola súa parte, o xornal alemán FAZ titulaba o 18 de agosto que España estaba a experimentar o peor incendio das últimas dúas décadas. Aínda que a súa análise abrangue a situación xeral do país, tamén recolle as axudas ofrecidas dende Alemaña: un convoi procedente de Bonn con 67 bombeiros e máis de 20 vehículos estaban preparados para desprazarse a España esta mesma semana. O medio destaca tamén as dificultades engadidas pola intensa vaga de calor, que complica enormemente as tarefas de extinción. Un día máis tarde, outra información puxo o foco nas áreas escasamente poboadas, as máis castigadas polos incendios: miles de persoas tiveron que abandonar os seus fogares e diversas reservas naturais sufriron danos graves.
Finalmente, o francés Le Monde dedicaba este mércores unha peza aos fenómenos climáticos que está a sufrir Europa este verán. Nela, Galicia aparece mencionada como unha das zonas máis devastadas do noroeste da península ibérica, un territorio especialmente afectado pola combinación de calor extremo, seca e abandono forestal.
Unha mirada dende Estados Unidos
A situación de Galicia non se limita só á atención dos medios europeos. O prestixioso xornal estadounidense The Washington Post publicou tamén unha peza informativa sobre España e a vaga de incendios e calor extremo que está a asolar o país. Xa dende o inicio do artigo, Galicia aparece mencionada como unha das zonas máis castigadas pola extensión do lume.
O texto sinala que as brigadas de loita contra os incendios forestais están a traballar especialmente na rexión galega, un territorio que agarda reforzos doutros países europeos para poder conter unhas lapas de enorme dimensión.
A información, difundida hai tres días, facía referencia a 12 grandes incendios forestais activos, a maioría concentrados na provincia de Ourense. Na actualidade, esa cifra reduciuse a sete, unha estatística que, malia seguir a ser alarmante, amosa unha leve mellora co paso dos días.
En contraste, outros medios de referencia mundial, como The New York Times, non teñen publicado ata o momento ningunha información específica sobre os incendios de Galicia.
Visibilidade dende Portugal
A veciña Portugal enfróntase tamén a unha vaga de incendios de grandes dimensións, unha situación semellante á que sofre Galicia. Non obstante, o xornal Público leva máis dunha semana ofrecendo cobertura detallada sobre os lumes galegos. Grazas á proximidade xeográfica e cultural, o medio portugués logra afastarse da visión excesivamente xeral doutros xornais internacionais e achegar unha información máis matizada e próxima á realidade da cidadanía.
O pasado martes Público publicaba unha reportaxe sobre as diferentes manifestacións contra a instalación dunha macroplanta de celulosa en Palas de Rei (Lugo), así como o rexeitamento social á actividade de Altri. Estas mobilizacións non só expresan unha crítica ambiental, senón que tamén buscan previr futuros lumes e promover modelos de recuperación máis sostibles para as zonas xa afectadas. O enfoque do xornal portugués, polo tanto, afástase da panorámica xeral da vaga de incendios para poñer o acento na resposta cidadá e na defensa do territorio.
Así mesmo. o medio destacou o aumento excepcional de partículas finas provocado polos incendios peninsulares. De feito, remarcan que a concentración de PM2,5 está a superar os límites recomendados pola Organización Mundial da Saúde (OMS), especialmente nas provincias de Lugo e Ourense, o que supón un risco engadido para a saúde pública.
Porén, a situación en Portugal continúa a ser extremadamente grave. Ata o 17 de agosto, os incendios consumiran unhas 172.054 hectáreas, unha cifra que non só supera con moito o total rexistrado no exercicio anterior, con 136.424 hectáreas, senón que tamén sitúa o país veciño ante unha das súas peores vagas de incendios das últimas décadas.
