Galicia superou os 38 graos o pasado 22 de setembro tras varias xornadas continuadas de altas temperaturas. Ourense foi unha das 98 estacións da Axencia Estatal de Meteoroloxía (Aemet) que acadou os 35ºC o pasado martes, chegando case aos 40ºC. Con todo, a calor abafante será substituída por un descenso de ata 10 graos nas temperaturas máximas a partir do venres. A causante é unha masa de aire de orixe marítima, máis fresca, que comezará con néboas persistentes nas Rías Baixas.
A asociación deste fenómeno cunha fronte pon data e hora para a volta das chuvias a Galicia: cara ao final da tarde do sábado 26 de setembro. Este episodio podería ter continuidade a próxima semana e, a máis curto prazo, os modelos sinalan que o domingo poderían producirse chuvascos acompañados de tormentas en Galicia.
Este conxunto de sucesos meteorolóxicos produce o que o portal Meteored chama “un baixón notable e mesmo extraordinario” das temperaturas no noroeste peninsular, sobre todo no norte galego, Asturias, Cantabria, País Vasco e norte de Navarra. Así, a partir do sábado a dorsal de aire cálida subtropical que está a provocar este destacado episodio de altas temperaturas irá dando paso a un tempo máis irregular e propio da estación de outono.
