Máis de 70.000 hectáreas arrasadas nunha das vagas de incendios máis devastadoras da historia de Galicia. Con sete lumes aínda activos en Ourense, e o foco imparable de Larouco con 20.000 hectáreas calcinadas, as previsións meteorolóxicas de cara aos próximos días ofrecen un raio de esperanza. Segundo o prognóstico de Meteogalicia, agárdanse chuvia febles e unha baixada de temperaturas para as próximas xornadas. A principal responsable será unha baixa sobre Francia, que achegará humidade ao noroeste.
Este martes agárdanse chuvias febles en boas partes do territorio, sobre todo no interior da metade norte e en zonas altas. Aínda que non semella que serán suficientes para extinguir os lumes, si axudarán no incansable traballo dos efectivos de emerxencia e dos voluntarios. En concreto, nas montañas de Lugo e Ourense, onde hai varios incendios devastando enclaves naturais e aldeas. As temperaturas rexistrarán un lixeiro descenso ao longo do día, que se prolongará nas vindeiras xornadas.
O anticiclón volve na fin de semana
A masa de aire húmida procedente de Francia continuará favorecendo os traballos de extinción durante o mércores. De novo, espéranse chuvascos febles na metade norte e no interior da comunidade, incluíndo a metade sur de Lugo, outra das zonas máis afectadas polos lumes. As máximas continuarán por debaixo dos 30 graos o xoves, cunha situación semellante á de días anteriores: Galicia estará situada nunha zona intermedia entre as baixas e as altas presións. Agárdanse chuvascos ocasionais, máis probables canto máis ao norte.
O anticiclón volve coller forza en Galicia o venres, cando se esperan temperaturas por enriba dos 30 graos en Pontevedra e nas Rías Baixas. Haberá tempo solleiro e non hai previsión de chuvia. Non obstante, as baixas presións predominarán a partir do domingo, cunha alta probabilidade de precipitacións en moitos puntos da xeografía. As temperaturas non experimentarán cambios significativos.
