Nove focos activos e máis de 62.000 hectáreas queimadas, segundo a última actualización da Consellería de Medio Rural. A provincia de Ourense é o epicentro da peor catástrofe incendiaria da historia de Galicia. O lume de Chandrexa de Queixa e Vilariño de Conso continúa activo, arrasou 17.500 hectáreas e xa se considera o máis grande do país dende que hai rexistros. Moi de preto está o de Larouco-Seadur, tamén activo e con 15.000 hectáreas devastadas. Unhas cifras arrepiantes que deixan fondas cicatrices no territorio. O satélite Sentinel-2 capturou as amplas superficies calcinadas en Galicia e as grandes columnas de fume que se elevan.
A imaxe data do 16 de agosto, último día do que se permite unha visualización aérea dende a aplicación de Copernicus. Vese, así, o comezo do incendio de Carballeda de Avia e Beade e, tamén, as amplas extensións queimadas polos lumes de Chandrexa de Queixa, de Larouco, da Gudiña e da Mezquita, o de Oímbra e, tamén, o que está a afecta a Pena Trevinca e arrasa parte da fronteira entre Galicia e Castela e León.
