A poboación xa está na conta atrás para poder vivir un evento histórico o vindeiro 12 de agosto: a eclipse total de Sol. Será a primeira vez que se poderá observar o fenómeno en España dende 1912 e a súa banda de totalidade pasa directamente polo norte de Galicia. Máis aló da astronomía, a xornada atraerá conversas arredor da cosmoloxía, da psicoloxía e será protagonista de impresións ópticas como o efecto Purkinje. Trátase dunha tendencia do pico de sensibilidade de luminancia do ollo cando se ve afectado por un cambio brusco, ao adaptarse á escuridade. En consecuencia, as cores vermellas, laranxas e amarelas parecerán máis escuras, mentres que as verdes e azuis adquirirán un resplandor inusual.
Por exemplo, á luz do sol, as flores do xeranio son dunha cor vermella brillante fronte ao verde apagado das súas follas. Con todo, o que ocorre durante fenómenos como unha eclipse total é que o contraste cambia as tonalidades: os pétalos parecen dunha cor vermella escura ou negra e, as follas, relativamente resplandecentes.
Trátase dun fenómenos perceptible só ao longo da banda de totalidade, polo que as rexións do norte de Galicia poderán experimentar o efecto Purkinje. Isto ocorre porque é a zona onde a Lúa cubrirá por completo o Sol e a luz ambiental diminuirá de forma drástica, mentres que nas zonas de parcialidade —como a provincia de Pontevedra e o sur de Ourense— o ceo verase dunha cor gris azulada e o cambio será menos evidente.
Que pasa no ollo?
O efecto Purkinje ten unha explicación científica localizada no ollo: ocorre na transición entre o uso primario dos conos e dos bastóns. Os conos son as células encargadas de distinguir as cores e os detalles da imaxe, e os bastóns son moito máis sensibles á escuridade e non distinguen coa mesma precisión.
No contexto dunha eclipse total, a medida que a intensidade da luz se atenúa cando avanza a totalidade, os bastóns toman o relevo e, antes de que a cor desapareza completamente, pasan a desempeñar o papel principal. Desta forma, varía a lonxitude cara a ondas máis curtas, o que provoca este curioso cambio na percepción das cores durante unha eclipse total de Sol como a do próximo 12 de agosto. Con todo, no caso das zonas onde persista a parcialidade, a retina seguirá funcionando principalmente cos conos.
