Tsuchinshan-ATLAS (C/2023 A3), o cometa do século, segue dando que falar. O seu paso, coincidindo cun novo episodio de auroras boreais e co pico de actividade das Oriónidas, será especialmente recordado en Galicia pola súa proximidade (a simple vista) con respecto á estrela Rosalía de Castro, tal e como fotografou o profesor da Universidade da Coruña e enxeñeiro do CITEEC Félix Sánchez-Tembleque.
A imaxe foi tomada o domingo 20 de outubro ás 21:30 horas na praia de Pedra do Sal, en Baldaio (A Coruña). En realidade, tal e como explica o seu autor, trátase dun conxunto de 15 imaxes amontoadas, cada unha delas cunha exposición de 30 segundos. Segundo conta Sánchez-Tembleque, esta técnica permite diminuír o ruído das imaxes e destaca detalles tenues, “aínda que, neste caso, o cometa foi visible a simple vista sen necesidade de prismáticos ou telescopio”. Iso si, evitando a contaminación luminosa e fuxindo na medida do posible do brillo dunha Lúa case chea. Na imaxe distínguese perfectamente a estrela de Rosalia, e mesmo a anticola do cometa.
