Este mércores 22, a noite estará coroada polas Líridas, a primeira cita da primavera para os amantes do ceo. Esta chuvia de estrelas é visible tanto dende o hemisferio norte como, en menor medida, no sur, entre o 16 e o 25 de abril. Trátase do primeiro grande espectáculo de estrelas fugaces en case dous meses, dende a visita das Cuadrántidas a comezos de xaneiro.
O punto álxido desta cita astronómica será durante a noite do mércores 22 ás 21:40, hora peninsular española. As previsións meteorolóxicas non acompañan os afeccionados da observación das estrelas: agárdanse ceos cubertos, e ata choivas, na maior parte do territorio galego. A Lúa atoparase en cuarto crecente e estará situada nunha zona do ceo oposta á radiante (o punto do que parecen xurdir os meteoros). Resulta habitual que o evento reciba o nome da súa radiante. Neste caso, a denominación das Líridas provén da Constelación de Lira.
Un fenómeno con milenios de historia
As Líridas veñen producidas polos fragmentos que se desprenderon de Thatcher (C/1861 G1), un cometa que completa unha órbita ao Sol unha vez cada 415 anos. Cando se aproxima ao astro, a calor sublima o xeo do seu núcleo, o que impulsa a liberación de po e refugallos rochosos que quedan suspendidos no espazo. Cando estes meteoroides entran en contacto coa atmosfera da Terra, a fricción co aire provoca a súa combustión e, en consecuencia, ocasiona un resplandor luminoso que conforma a choiva de estrelas.
O Observatorio Astronómico Nacional sinala que as Líridas contan cunha actividade media de 20 meteoros por hora e unha velocidade de 49 km/s. En edicións anteriores, esta choiva acadou a centena de meteoros por hora; porén, non se prevé que este ano se una a unha desas ocasións destacadas.
Este acontecemento astronómico non é novo: xa existen referencias que aluden ás Líridas hai 2600 anos, no libro de crónicas Zuo Zhuan, datadas do 687 a.C. Considérase unha das chuvias de estrelas máis antigas das que se teñen rexistros.
Consellos para unha mellor observación
Se ben é certo que se trata dun evento modesto en relación a outros, como o das Perseidas, garantir unha boa observación pode aumentar a probabilidade de ver máis destes destellos e, con iso, facer a experiencia moito máis memorable.
As recomendacións habituais son aplicables tamén nesta ocasión: debe buscarse un lugar co ceo escuro, afastado de grandes fontes lumínicas e co menor número posible de elementos —edificios, árbores, montañas, etc.— que obstrúan a visibilidade. Deberán priorizarse os lugares con horizontes despexados.
Será prefirible dirixir a mirada cara ás áreas máis escuras do firmamento, en concreto no sentido contrario á posición da Lúa, e, cando se poida, situarse nun espazo onde algún obstáculo obstrúa a claridade do astro. Tamén é importante acostumarse á falta de luz durante varios minutos e evitar encender a pantalla do teléfono para manter a maior escuridade posible.
Este evento precede a temporada alta de choivas de meteoros, que culmina coas Perseidas no verán. A próxima cita para os seguidores das citas meteoríticas será o 6 de maio, coas Eta Acuáridas.
