Ca chegada da primavera regresa o mosquito tigre a Galicia. O primeiro caso do ano foi identificado recentemente na localidade pontevedresa de Moaña, un dos puntos máis conflitivos e o primeiro lugar onde foi detectada esta especie considerada un gran vector de transmisión de enfermidades humanas e animais.
A aplicación Mosquito Alert verificou a presenza dun exemplar de Aedes albopictus a finais do mes de abril. Trátase da primeira vez no ano que se confirma a localización dun mosquito tigre, que pode identificarse grazas á liña branca no tórax que o caracteriza.
Esta especie invasora foi identificada por primeira vez en Galicia no verán do ano 2023 na parroquia morañesa de Tirán. Especúlase que a orixe da chegada ao Morrazo do mosquito tigre puido deberse ao tráfico portuario de Vigo. En total, en 2024 identificáronse 107 exemplares a través da aplicación Mosquito Alert, na que os usuarios suben fotografías dos mosquitos sospeitosos que son logo verificadas por expertos.
Transmisores de virus como o zika
O mosquito tigre, orixinario do sueste asiático, chegou ao levante peninsular hai dúas décadas. O Aedes albopictus, que recibe o seu alcume felino polas raias que decoran o seu tórax, é un potencial transmisor de virus como o zika, o dengue e o chikungunya.
A especie ten preferencia polas temperaturas moito máis tépedas do norte peninsular, onde a choiva e a humidade favorecen a súa reprodución e crecemento. Ademais, prefire as zonas máis urbanas e cría en depósitos de auga que se atopan nos ambientes máis domésticos.
Esta última é unha das grandes singularidade dos mosquitos tigre, que non adoitan reproducirse en grandes masas de auga corrente: prefiren charcos ou pequenos espazos de augas estancadas, como poden ser os recipientes nos que beben as mascotas.
