Un estudo de 800 metros cadrados. Tecnoloxía de última xeración con escenarios hiperrealistas. Unha estrutura pioneira creada en tempo récord. Todo, tras a colaboración da Deputación da Coruña e o Clúster do Audiovisual Galego, co apoio do Goberno de España. Coruña Estudo Inmersivo (CEI) é o maior escenario de produción virtual de Galicia e de España e busca combinar innovación e creatividade ao seu máximo nivel.
“Supón unha aposta estratéxica pola modernización e profesionalidade do sector”, asegura o presidente da Deputación da Coruña, Valentín González Formoso, que lembra que é “clave” para a economía e a cultura galega. Esta industria é unha das principais actividades culturais da comunidade e sostén máis de 4.500 postos de traballo. Ademais, conta con 707 empresas e unha facturación anual que supera os 411 millóns de euros.
Estas novas instalacións permiten a creación de escenarios hiperrealistas sen saír do estudo. Unha persecución de coches, unha batalla espacial, unha loita cunha ambientación medieval… O sistema de tecnoloxía de inmersión permite crear todo tipo de situacións de cara á gravación de ficción.
Grande impacto no emprego
“Galicia entra de cheo na era da produción virtual, ofrecendo unha infraestrutura única en España e referencial en Europa”, destaca González Formoso. Ademais, terá un impacto directo no emprego. Diversas produtoras e compañías internacionais xa están planificando rodaxes neste centro. De momento, xa ten consecuencias positivas coa formación de novos técnicos para traballar neste estudo. O CEI chega nun momento de aumento da demanda de producións europeas. Por iso, ter un dos obxectivos máis importantes do continente supón colocar a Galicia nun lugar central neste sector.
En total, é unha infraestrutura de máis de 2.000 metros cadrados, cun estudo con tecnoloxías en realidade virtual, aumentada e estendida. “O futuro do audiovisual xa está aquí, e Galicia está preparada para lideralo”, salienta González Formoso. A súa instalación conta con máis de 758 paneis LED 4K que permite o hiperrealismo e a facilidade para interactuar con elementos físicos en tempo real. “Pasamos a estar colocados na primeira división europea”, asegura Alfonso Blanco, presidente do Clúster Audiovisual Galego.
A idea xorde como resposta á alta demanda e á madurez do sector audiovisual galego. “O sector audiovisual galego vive un momento de crecemento sen precedente”, recordou González Formoso. Nos últimos anos, Galicia creou series e películas líderes en audiencia, como Rapa, Clanes ou Matria. O que precisaba era unhas instalacións que fosen acordes ao nivel desta industria.
Un proxecto realizado en tempo récord
Este sistema pode ter unha gran repercusión non só nas grandes producións, senón tamén nas independentes. O que antes non era asumible para unha empresa pequena, xa que precisaba de moitas localizacións en diversos lugares do mundo, moitos días de rodaxe e unha serie de riscos como as condicións meteorolóxicas, agora será moito máis accesible.
“É unha forma de producir que vén para quedar”, asegura Blanco. Tamén recorda que era algo necesario, e que houbo unha resposta institucional moi rápida. Desde que se trasladou a idea á Deputación da Coruña e ás administracións públicas, só pasaron dous anos ata que se rematou este centro. Unha rapidez que é esencial para a súa eficiencia. Agora, prevé comezar a realizar producións neste mesmo ano. Ademais, podería ter aplicacións para outros ámbitos, como para o sector dos videoxogos.
Este complexo ampliarase ao longo de 2026 coa construción de dous estudos adicionais, de 2.000 e 2.500 metros cadrados. É unha oportunidade para atraer proxectos internacionais nunha etapa de maior investimento privado por parte das plataformas dixitais nas producións de Galicia.
Moito máis que un escenario
Non todo vai de pantallas. O CEI tamén ten un sistema de tracking chamado Pixotope Vision e conta con cámaras integradas. Entre estas, atópase a Arri Alexa LF, con ópticas incluídas. A Arri Alexa LF é unha cámara de gama alta e un estándar no cine de máximo nivel e, coas tecnoloxías presentes no escenario, os técnicos poderán xestionar múltiples contidos a tempo real. Tamén conta con sistemas de iluminación e de almacenamento e sincronización dos contidos. As salas de edición, de axuste da cor, VFX e posprodución completan as instalacións e reúnen todo o necesario para facer proxectos de calidade.
“En Galicia sempre houbo talento, sempre houbo creatividade, e o sector audiovisual sempre foi un referente”, salientou durante a presentación do CEI o ministro para a Transformación Dixital e da Función Pública, Óscar López. O investimento neste proxecto tamén busca conseguir reter ese talento. O audiovisual é un dos ámbitos máis potenciados na educación. Con tres graos en Comunicación Audiovisual repartidos nas tres universidades públicas e diversos mestrados, Galicia conta cunha gran canteira. Por iso, o reforzamento da industria neste ámbito pode fortalecer á comunidade como un núcleo de produción a nivel europeo.
Unha colaboración público-privada
A xestión do CEI corresponde a Pedralonga Estudios, unha empresa conxunta que combina ata dez das principais empresas galegas do sector audiovisual. Entre ambos, búscase poñer en práctica a colaboración da administración pública co sector privado. “A unión fai forza”, asegura Formoso, que resalta este método como garante da “xestión eficiente”. Pedralonga Estudios será a encargada de xestionar e promover esta iniciativa durante os seguintes 20 anos, prorrogables por cinco anos máis.
O proxecto contou co financiamento da Deputación da Coruña e cos fondos Next Generation do Plan de Recuperación do Goberno de España. Tamén conta co investimento de empresas privadas e a xestión doutros actores.
Os seus estudos atópanse na Cidade das TIC, sobre os terreos da antiga fábrica de armas. Agora, estase a converter nun importante polo para a innovación dixital, tanto nacional como internacional. Ademais, atrae a chegada de novas empresas. “Ter un polo de produción e tecnoloxía é algo moi positivo que veremos en poucos anos”, afirma Blanco. De momento, a creación de audiovisual de máxima calidade xa chega para quedarse en Galicia.
