A administración Trump asegura que ten un anuncio importante para hoxe no ámbito da saúde. E, segundo The Washington Post, é porque as autoridades estadounidenses teñen a intención de relacionar o paracetamol, con marcas como o Tylenol, cos casos de autismo. A administración americana cre que a toma do fármaco provoca autismo, segundo adiantou o xornal estadounidense. Porén, un estudo en 2024 analizou 2,4 millóns de nacementos e non atopou ningunha relación. Ademais, a comunidade científica é escéptica co anuncio. De momento, non se publicou ningún novo estudo ou proba que argumente a decisión do goberno de Trump.
“Non hai probas sólidas nin estudos convincentes que suxiran que exista unha relación”, explica Monique Botha, profesora asociada de Psicoloxía Social e do Desenvolvemento na Universidade de Durham para Science Media Centre (SMC). A experta recalca que o alivio da dor das mulleres embarazadas é insuficiente e o paracetamol é unha das opcións máis seguras.
Un estudo desmentiu en 2024 a relación co paracetamol
De momento, segundo o Washington Post, o Goberno só emitirá unha recomendación de que as mulleres embarazadas non tomen o medicamento. Con todo, os expertos aseguran que esta advertencia pode facer moito dano. “O alarmismo impedirá que as mulleres accedan á atención adecuada durante o embarazo”, asegura Botha, que remarca que podería estigmatizar a familias con fillos autistas. “Corre o risco de que se reavive o antigo patrón de vergoña e culpa materna”, recalca.
“O autismo é o resultado de varios factores, a miúdo combinados, como a predisposición xenética ou a falta de osíxeno no momento do nacemento”, explica para SMC Dimitrios Siassakos, profesor de Obstetricia e Xinecoloxía na University College London Hospital. No pasado, algún estudo si apuntou a algunha vinculación, como foi o caso do realizado polo Instituto de Saúde Global de Barcelona. Porén, un dos estudos que foi punto de inflexión para avaliar a posibilidade desa relación foi un documento sueco no que analizaron 2,4 millóns de nacementos e observaron a irmáns. Non había ningún tipo de vinculación e amosaron que o importante era o historial familiar, non o uso do Tylenol. “As investigacións demostran que calquera aumento marxinal aparente como resultado do paracetamol no embarazo, tende a desaparecer cando as análises teñen en conta factores máis importantes”, concreta Siassakos.
Propoñen unha “cura” para o autismo
O Washington Post tamén afirma que a administración Trump proporá a leucovorina como tratamento do autismo. A leucovorina prescríbese para contrarrestar os efectos secundarios dalgúns medicamentos e para tratar a deficiencia de vitamina B9. Porén, Botha remarca que de momento as probas sobre esta medicación son excepcionalmente provisionais e aínda non son sólidas. “Malia que os medicamentos poden axudar en aspectos moi específicos, non existe ningún que cure ou elimine activamente o autismo”, clarifica. Podería, nalgúns casos, axustar o comportamento e reducir os síntomas que contribúen ao seu malestar, comenta a experta.
“Mañá teremos un dos anuncios médicos máis importantes da historia do noso país”, asegurou onte o presidente dos Estados Unidos, Donald Trump, que cre que atoparon unha solución ao autismo. “As persoas autistas son excepcionalmente heteroxéneas”, concreta Botha. Os medicamentos poden funcionar para trazos específicos en contextos moi particulares, pero as afirmacións sobre curas ou tratamentos xerais tenden a non ser precisas, útiles nin éticas, defende.
Desde que Trump chegou ao poder e Robert F. Kennedy Junior lidera o Departamento de Saúde dos Estados Unidos, unha das prioridades da administración foi frear o que chaman “a epidemia do autismo”. Segundo o Washington Post, as présas de Kennedy xeraron alarma entre investigadores porque advertían que necesitaban un proceso largo. O encargado do Departamento de Saúde propúxose ter unha resposta para setembro e parece que chegou. Iso si, de momento, co escepticismo e rexeitamento dos expertos.
