Os recentes avances na análise de sangue periférica permitiron cuantificar con precisión os biomarcadores da enfermidade de Alzhéimer nas fases iniciais do seu desenvolvemento, de forma económica, non invasiva e segura. Agora, o equipo investigador do Instituto de Psicoloxía da USC e do IDIS presenta novos resultados sobre a capacidade destes marcadores en plasma, obtido a partir de mostras de sangue, para diferenciar etapas do proceso patolóxico.
O obxectivo principal do estudo foi contribuír á caracterización clínico-biolóxica das fases iniciais do deterioro cognitivo combinando a medición de biomarcadores sanguíneos con análises de neuroestruturas da enfermidade en grupos de persoas participantes clasificadas segundo o seu fenotipo clínico-cognitivo.
Dos seis biomarcadores de proteínas alteradas analizados, o p-tau217 e o p-tau181, nesta orde, mostraron unha elevada capacidade de asociación. Por iso, confírmanse como “os mellores candidatos para dispoñer en breve de biomarcadores en plasma capaces de identificar o risco de padecer a enfermidade nun período que pode chegar aos 10-15 anos antes de se desenvolver”, explica o profesor Arturo X. Pereiro.
Trátase do primeiro estudo en España que emprega este tipo de marcadores en persoas maiores en etapas presintomáticas da enfermidade, é dicir, cando aínda non cumpren os criterios diagnósticos dunha demencia. Isto difire dos traballos publicados polo Hospital del Mar Research Institute e do Barcelonaβeta Brain Research Center (BBRC), vinculado á Fundación Pasqual Maragall, que incluían a persoas xa diagnosticadas con demencia.
Un estudo lonxitudinal
O traballo realizouse con participantes galegos dentro do Compostela Aging study (CompAS), un estudo lonxitudinal que xa analizou tres cohortes con seguimentos de entre 5 e 7 anos cada unha. A investigación, liderada por Arturo X. Pereiro, Montse Zurrón, Fernando Díaz e Cristina Lojo, do grupo de investigación en Neurociencia Cognitiva e Psicoxerontoloxía do Instituto de Psicoloxía da USC, conta coa colaboración de grupos da USC, do CIMUS, e do IDIS.
Segundo explica Pereiro: “O noso estudo achega valor adicional aos resultados informados nese primeiro traballo porque analiza as asociacións deses marcadores con probas de neuroimaxe e síntomas clínicos en etapas máis temperás, presintomáticas e prodrómicas, en persoas potencialmente en risco de padecer a enfermidade no futuro”.
A investigación, titulada ‘Biomarcadores plasmáticos e neuroestruturais na caracterización clínico-biolóxica das primeiras etapas do continuo da enfermidade de Alzhéimer: achados do Compostela Aging Study‘ (Plasma and neurostructural biomarkers in the clinical-biologica characterization of early stages of the Alzheimer’s disease continuum: findings from the Compostela Aging Study) conta con financiamento do Ministerio de Ciencia, Innovación e Universidades e da Axencia Galega de Innovación. O estudo foi xa aceptado para publicarse na revista científica The Journal of Prevention of Alzheimer’s Disease.
