A neuropilin-1 (NRP1) é unha proteína vinculado á formación de amiloide nos pacientes con alzhéimer. Porén, un estudo achou proteínas similares a aquelas vistas en pacientes con covid. Coñecidas polo seu funcionamento no cerebro, o estudo constata que tamén se producen acumulacións semellantes nas retinas. Isto podería explicar por que a néboa mental, un termo utilizado para problemas de memoria ou de cognición, é un dos síntomas do que moitos pacientes aseguran ter tras sufrir a covid.
O estudo, realizado pola Universidade de Yale, observou que os pacientes con este problema tiñan placas similares aos que teñen alzhéimer. Malia que os mecanismos da néboa mental aínda non se comprenden, os estudos si que acharon unha relación entre o coronavirus e a acumulación de beta amiloides no sistema nervioso central.
Para poder entender mellor a reacción con esta proteína, o seu equipo utilizou tecidos das retinas. A intención era imitar as características do alzhéimer, como presentar mutacións xenéticas para producir máis beta amiloide. O equipo achou que a covid pode entrar nas células das retinas. Tamén, que esas proteínas que normalmente se atopan nos cerebros das persoas con alzhéimer foron tamén achadas nas súas retinas.
Inhibir o NRP1
Un dos descubrimentos máis destacables é que ao engadir un inhibidor de NRP1 conseguiron frear este aumento de amiloide beta, o que apunta a esta proteína como un posible obxectivo terapéutico para combater complicacións neurolóxicas da covid, como a néboa mental.
“Este achado reforza a hipótese antimicrobiana do amiloide beta no alzhéimer, suxerindo que podería actuar como parte da resposta inmune innata do cerebro fronte ás infeccións virais”, explica Brian Hafler, doutor en oftalmoloxía pola Universidade de Yale. O amiloide beta non só é un marcador do dano cerebral, senón que podería participar na defensa fronte ao virus. O equipo planea agora estudos clínicos para determinar se a Covid aumenta o risco a longo prazo de ter alzhéimer e explorar o uso de inhibidores NRP1 como posibles tratamentos para previr a patoloxía.
