Moitas persoas viaxan ata Islandia para poder contemplar as auroras boreais, sen saber que dende Galicia tamén é posible velas. Así, na madrugada do 12 de novembro, entre as 3:00 e as 5:00 horas, puido observarse un ceo tinguido de cores rosas e vermellas, concretamente no concello de Vila de Cruces.
Este espectacular fenómeno produciuse, por unha banda, debido a dúas fortes execcións de masa coronal do Sol cara á Terra, que transportaron plasma solar a unha velocidade de arredor de 1.500 quilómetros por segundo. Por outra banda, tamén se explica pola presenza dunha tormenta solar severa de categoría 4. O Sol mantén nestes días unha intensa actividade, e a nova tormenta acadou unha magnitude de X5.3, unha das máis altas rexistradas nos últimos anos.
O Space Weather Prediction Center emitiu un aviso pola potencia desta tormenta e advertiu de que podería deixar novas auroras boreais visibles no ceo. Con todo, as posibilidades de observalas dende Galicia reducíronse pola presenza da borrasca Claudia, que mantén o ceo cuberto de nubes en boa parte do territorio.
Auroras boreais: verdes ou rosas?
Se se as imaxes de auroras boreais que adoitan aparecer nas redes sociais son verdes, por que en Galicia se ven de cor rosa? Segundo informa o investigador Josep M. Trigo Rodríguez nun artigo publicado en The Conversation, trátase dos chamados arcos aurorais SAR (acrónimo de Stable Aurora Red arch ou Arcos Vermellos Estables). Son un reflexo afastado das auroras que se producen a grande altura nas latitudes boreais, e adoitan percibirse mellor a través da cámara pola súa maior sensibilidade. A intensidade das súas cores depende da actividade xeomagnética.
Trigo Rodríguez sinala que, nas latitudes medias, como a que ocupa Galicia, o habitual é observar unicamente auroras SAR. Aínda que tanto as auroras verdes como as vermellas ou rosadas están relacionadas co osíxeno, a súa cor varía en función da altura e da concentración deste elemento na atmosfera.
O meteorólogo Mario Picazo comparte en X a seguinte información: mentres as auroras verdes poden verse ata uns 240 quilómetros de altura e se producen en zonas con altas concentracións de osíxeno, as auroras vermellas son visibles durante períodos de intensa actividade solar debido á escaseza de osíxeno, como ocorre nestes días, e poden observarse por riba dos 240 quilómetros de altura.
