Auroras boreais en Galicia. Concretamente, no concello de Vila de Cruces. Así o capturou o fotógrafo José Ramón Moire, que compartiu estas espectaculares imaxes que amosan o ceo galego tinguido de vermello entre as 3 e as 5 da madrugada. As fotografías tomadas durante esta noite foron a consecuencia de dúas fortes execcións de masa coronal do Sol cara a Terra, transportando plasma solar a 1.500 quilómetros por segundo. O evento solar produciuse onte, xa que tardan unhas horas en chegar á Terra.
“Ás 3.20 vin na AEMET (Axencia Estatal de Meteoroloxía) que había posibilidades de auroras, saín e estaba un pouco despexado así que probei sorte”, explica Moire. O fotógrafo subiu ata o monte Mandanela, en Vila de Cruces, para capturar as imaxes. “A mellor parte foi ás 4.30 cando se vían a simple vista“, destaca.
Máis auroras boreais?
Isto súmase á tormenta solar severa, de categoría G4, que vai afectar á Terra nas próximas horas. O Sol segue agora con moita actividade e unha nova tormenta acadou unha magnitude de X5.3, unha das máis altas nos últimos anos. Especialmente pola súa velocidade, que se estima en 1.700 quilómetros por segundo. E xusto pola súa potencia publicouse un aviso desde a Space Weather Prediction Center e que afecta a Galicia, porque podería deixar estampas no ceo de auroras boreais como as que capturou Moire. Por desgraza, é moi improbable que sexan visibles en calquera punto da comunidade xa que todo o territorio está cuberto polas nubes que deixa a borrasca Claudia, segundo MeteoGalicia. A única opción sería que clarease nalgunhas zonas.
O fenómeno estímase que podería chegar cara á noite da xornada deste mércores, horas nas que unha parte importante de Galicia (Pontevedra e o suroeste da Coruña) está en alerta amarela ou laranxa, como no caso do oeste da Coruña. Só nalgúns puntos, como no norte da provincia de Lugo, as precipitacións serán menos probables en comparación co resto de Galicia, onde serán persistentes.
