Tras unha semana marcada por temperaturas excepcionalmente altas, Galicia recibirá a partir deste martes unha masa de aire máis fresca procedente do noroeste, coñecida como ventilador atlántico. Este cambio provocará un descenso notable dos termómetros, especialmente no interior da comunidade. Segundo MeteoGalicia, Ourense pasará dos 30 ºC previstos para o luns aos 23ºC do martes, unha caída de sete graos en apenas 24 horas. Pola contra, en cidades costeiras como Vigo o descenso será máis gradual, con temperaturas que baixarán dos 24 aos 21ºC no mesmo período. A maior inestabilidade coa que comezará o mes de xuño explícase polo desprazamento do anticiclón cara ao sur das Azores, o que facilitará a chegada de sistemas frontais ao noroeste peninsular.
Dende o portal meteorolóxico ElTiempo.es sinalan a entrada de ata tres frontes durante os próximos días. O primeiro chegará este martes, aínda que con pouca actividade, deixando abundante nubosidade e algunhas precipitacións en Galicia. Un segundo fronte afectará á comunidade durante a fin de semana ee traerá un incremento significativo da inestabilidade. Os modelos europeos indican que a temperatura media semanal en Galicia volverá situarse en valores propios desta época do ano, coincidindo co inicio do verán meteorolóxico, que comeza o 1 de xuño.
Ademais, o mércores espéranse chuvias febles, con acumulacións que poderían alcanzar os cinco litros por metro cadrado en zonas do oeste galego. A situación volverá complicarse o xoves, cando o achegamento dunha vaguada favorecerá un novo aumento da inestabilidade atmosférica e a aparición de precipitacións moderadas en distintos puntos da comunidade.
Moderadas na costa e abruptas no interior
Segundo as previsións de MeteoGalicia, o descenso das temperaturas chegará acompañado dun aumento da inestabilidade. Na costa, a baixada será moderada: na Coruña, Ferrol e Pontevedra as máximas manteranse arredor dos 20ºC ata o xoves. Pola contra, a probabilidade de precipitacións irá en aumento, alcanzando o 95% en Pontevedra, o 65% en Vigo e o 55% na Coruña.
No interior, a caída dos termómetros será moito máis notable. En Ourense, as temperaturas máximas poderían descender ata dez graos respecto aos rexistros dos últimos días, aínda que a probabilidade de chuvia será reducida, arredor do 5%. Unha situación semellante agárdase en Lugo, onde as temperaturas oscilarán entre os 20 e os 25ºC e as precipitacións terán maior protagonismo durante a xornada do martes 2. En Santiago de Compostela, pola súa banda, a probabilidade de chuvia situarase no 55%.
