A chegada do verán é sinónimo para os fotógrafos de captar algúns dos fenómenos naturais máis impresionantes de Galicia. Para DrewKorme xa é algo habitual. Unha vez máis, o autor gravou na praia de Rebordelo, na provincia da Coruña, o espectacular fenómeno do mar de ardora. O vídeo foi tomado ás 00:45 horas do pasado 27 de xuño.
As imaxes son únicas porque é moi raro captar na cámara o nivel de iluminación das microalgas que causan o efecto xunto á cor rosada do ceo, que o autor considera que pode ser unha aurora boreal. Dende o Observatorio Astronómico Ramón María Aller non descartan que se producira o fenómeno astronómico, pero cren que é improbable. Os expertos consideran que pola forma que ten, a previsión dese día e a análise que se pode facer da imaxe, non se pode confirmar (aínda que tampouco descartar) que sexa ese caso. De por si, as auroras boreais, aínda que non sexan moi potentes, son raras de ver en Galicia. Neste caso non eran visibles a simple vista, pero si mediante a cámara, adaptada para astrofotografía.
