O caso de Confi, tamén coñecido como Manoliño, entristece a comunidade galega. O arroaz, coñecido porque desde 2019 habitaba na costa de Galicia e tamén porque persigue e xoga cos barcos e persoas que atopa, leva desaparecido desde o pasado 3 de xuño. Desde a Coordinadora para o Estudo dos Mamíferos Mariños (CEMMA) cren que podería ser o golfiño que apareceu morto no peirao de Navantia en Ferrol.
“Non temos o 100% de garantía, pero o que vimos nas imaxes son compatibilidades co corpo de Confi”, explica Alfredo López, biólogo mariño do CEMMA. Cando atoparon o arroaz o 20 de xuño, non os avisaron a tempo e non puideron facer as comprobacións, polo que tiveron que intentar analizalo a través das imaxes tomadas.
Confi forma xa parte da historia da costa galega. Foi identificado por primeira vez en decembro de 2019. Arroaz tranquilo, xogaba a miúdo coas embarcacións e aproximábase con certa frecuencia aos humanos. Non foi o único. Hai outras historias, como Mercurio, Chilindrín e outros tantos que non teñen nome. Estes golfiños, aínda que foco dalgunhas noticias e da alegría dos que os ven, quedan cerca da costa, apartados, froito dos infrutuosos intentos de pertencer a unha manda. Moitos deles morren, como foi o caso de Chilindrín.
A dificultade de sobrevivir sen a manda
“Só uns pouquiños deses que son expulsados sobreviven, e só con algúns temos contacto durante moito tempo, como o caso de Confi”, explica López. Foi tamén o caso de Gaspar, entre 2007 e 2010. O golfiño apareceu polas costas galegas en diversas ocasións, xogando coas embarcacións e tamén cun carácter tranquilo, similar ao de Manoliño. Polos seus comportamentos, que se poderían clasificar de antisociais con respecto aos da súa especie, chámanse arroaces solitarios embaixadores. Malia que o animal busca moitas veces a poboación para interactuar con eles, desde CEMMA sempre recomendan, polo ben do propio exemplar e para non correr riscos, evitar esa relación.
Cando estes animais son apartados das súas mandas (de forma violenta), eles intentan, cando teñen a oportunidade, de volver a formar parte dunha. Confi nunca o conseguiu. O golfiño volveu mancado, en moitas ocasións, polas disputas para intentar formar parte dunha manda. “Para iso ten que medrar física e psicoloxicamente. Fisicamente si medrou, pero igual psicoloxicamente non”, explica o biólogo.
A integración de Gaspar
Malia que en moitas ocasións é complicado que ocorra, si hai casos de integración. É o caso de Gaspar. Hai indicios de que o golfiño que durante catro anos habitou polas costas galegas foi avistado cunha manda nas Illas Azores. “Tiña a mesma marca que Gaspar, pero claro, xa pasaran moitos anos”, considera López. A marca á que se refire é unha amputación con falta de masa ósea no lado esquerdo da cara, na boca.
“Que apareza esa amputación no mesmo sitio noutra parte do mundo é rarísimo, porque non é que tiña un labio levantado senón falta de masa ósea”, destaca. Aínda así, posto que foi a través dunhas fotos e que non se puido facer unha análise con calma, só se pode falar de compatibilidades.
Galicia queda sen o seu golfiño insignia. A crueza da natureza probablemente deixará fóra a outro exemplar nalgún momento polo que, co paso dos anos, seguro que teremos un novo inquilino nas nosas costas. Só queda esperar.
