Un vídeo está a xerar indignación nas redes sociais. Dúas persoas montadas nunha moto de auga na ría de Vigo fan eses sobre auga xusto sobre o punto no que acababan de verse dous arroaces tomando aire na superficie. Para moitos, as imaxes non deixan lugar a dúbidas: os motoristas pretendían pasar por riba dos cetáceos.
A escena foi captada desde o porto de Arcade e compartida o pasado mércores nun grupo de Facebook que reúne a veciños desta localidade, Vilaboa, Pontesampaio e Soutomaior. Aínda que se descoñece a data exacta no que ocorreron os feitos, o vídeo xa chegou a mans da Garda Civil para investigar un posible delito.
A Coordinadora para o Estudo dos Mamíferos Mariños (Cemma) desliga o que se ve na gravación ca aparición dun golfiño varado nas salinas de Ulló. Desde a entidade sinalan que o que aparecen no vídeo son dous arroaces e recorda que existe un real decreto específico desde 2007 con medidas para a protección dos cetáceos.
Con todo, lamentan que as imaxes captadas polo videoaficcionado non permitan identificar os ocupantes da moto acuática. Neste aspecto tamén fan fincapé fontes da Garda Civil consultadas por GCiencia, que non recibiron, até o de agora, unha denuncia sobre os feitos.
Ademais, instan á poboación a que dea aviso ao Seprona cando se presencian actitudes deste tipo contra os animais e, concretamente, contra os cetáceos. Unha chamada que cobra máis relevancia ante a chegada do verán, cando se multiplican as interaccións entre os animais e as embarcacións.
