Despois de semanas agardando pola calor, esta fin de semana tocan altas temperaturas que permitirán aos amantes das praias darse os primeiros baños da tempada. Pero deberán aproveitar para facelo antes da tarde do domingo. Porque a entrada dunha dina no mediodía provocará un drástico cambio no tempo. De 30 graos pasarase en moitos puntos a 20 en menos de 24 horas.
Pero antes, teremos uns días propios do verán, con tempo solleiro na meirande parte da comunidade e temperaturas que irán en ascenso desde este venres. O aire que arrefriou os termómetros nos últimos días vaise retirando da man dun anticiclón para deixar boa parte de Galicia con máximas de 25 graos.
Un ascenso térmico que tocará teito o sábado, cando se agarda chegar preto dos 30 graos, especialmente no sur da comunidade galega. Todo acompañado de ceos despexados para desfrutar do Día das Letras ao aire libre.
Domingo de cambio
Os cambios chegarán o domingo, segundo apuntan as predicións de Meteogalicia. Pero aínda será posible desfrutar deste verán anticipado durante a mañá e as horas centrais do día. A calor manterase, pero será o preludio da chegada das treboadas.
A inestabilidade instalarase en Galicia debido á entrada dunha depresión illada en niveles altos, o que se coñece como dina. Provocará chuvascos puntualmente fortes acompañados de aparello eléctrico.
O aire frío nas capas altas da atmosfera fará que se esborrallen as temperaturas de cara ao luns. Así, viviremos un descenso térmico de ata dez graos en menos de 24 horas. Deste xeito, as máximas non superarán os 20 graos o luns, xornada na que continuarán as precipitacións xeneralizadas en Galicia.
Pero esta situación de inestabilidade non durará moito. O martes, Galicia volverá a quedar baixo a influencia dun anticiclón que devolverá os ceos descubertos e fará que as temperaturas volvan ascender de forma paseniña co pasos dos días.
