Os servizos de emerxencia rescataron a mañá do martes unha femia adulta de golfiño común. O cetáceo quedara varado pola baixamar nas Salinas de Ulló, en Vilaboa. Desde a Coordinadora para o Estudo dos Mamíferos Mariños (CEMMA) consideran que podería deberse a un erro de navegación. Ás veces, están moi famentos e perseguen á súa présa ata que, cando se dan conta, están atrapados pola marea baixa.
Un aviso dunha persoa na zona logrou que os expertos chegasen a tempo para o seu coidado e traslado en camión ata o porto de San Adrián de Cobres. O animal presentaba algunhas feridas pero atopábase en bo estado. Coa colaboración do alcalde e coa do armador e da tripulación do bateeiro “Vidal Calvar”, liberárono á altura de Liméns. Só no primeiro trimestre do ano xa se rexistraron máis de 200 varamentos de cetáceos.
