Únete á nosa canle de Whatsapp
Hai algo máis de tres anos, en abril de 2016, a Unidade Móbil da Rede de Varamentos de Galicia, executada pola Cemma, acudiu a unha zona intermareal próxima á illa da Toxa, na ría de Arousa, para atender a dous arroaces (Tursiops truncatus) que se encontraban nunha situación comprometida. Os dous exemplares, unha femia adulta nomeada como Eunice, e unha cría, Toxeiro, foron liberados nunha zona próxima de augas máis profundas. Un ano despois, no mesmo lugar, apareceu outra familia, composta por Beyonse e Beijin, nai e cachorro, que do mesmo xeito foron rescatados e liberados ante o risco de varamento.
E segundo puido constatar nas últimas semanas a Coordinadora para o Estudo dos Mamíferos Mariños, os catro arroaces conseguiron sobrevivir a este rescate, xa que foron identificadas recentemente no marco do proxecto Turgasur, que conta co apoio da Fundación Biodiversidad. A iniciativa está servindo para ampliar, catalogar e revisar o arquivo fotográfico dos arroaces fotografados en Galicia pola Cemma nos últimos 20 anos. Son, en total, máis de 70.000 fotografías e máis de 580 aletas dorsais (a seña de identidade destes mamíferos) que se están analizando para mellorar o coñecemento do hábitat da especie. Só nos últimos seis, meses, grazas ás saídas de traballo, conseguiron tomarse máis de 13.000 novas imaxes.
Os arroaces Eunice, Toxeiro, Beyonse e Beijin
Despois de seren rescatados en 2016 e 2017, as revisións de Turgasur acabaron constatando a supervivencia destas familias. Quince días despois do rescate, Eunice e Toxeiro foron identificados noutra mostraxe na ría de Arousa. E o pasado 16 de maio, cando a Unidade Móbil da Cemma estaba buscando nas inmediacións do porto do Xufre unha pequena balea que se achegara á zona, deron con Eunice. “Esta vez xa non estaba en compañía do seu cachorro Toxeiro, que xa se debeu de ter emancipado dela. Estaba acompañada do arroaz Ioio, o que puidera indicar o inicio dun novo ciclo reprodutivo para ela”, explica a Cemma.
Por outra banda, Beyonse segue tamén nadando por augas galegas. Trátase dun exemplar que xa fora rexistrada no 2004 na ría de Pontevedra. Despois do varamento de 2017 xunto ao seu cachorro Beijin, foron observados na ría de Vigo en marzo de 2018. E en abril deste ano, Beyonse apareceu de novo na zona da Rede Natura de San Simón. Xa non estaba acompañada por Beijin. “Consideramos que, posiblemente, ten iniciado un novo ciclo reprodutor, polo que estaremos moi atentos durante as próximas mostraxes para tratar de comprobar se tivo unha nova cría este ano“, explican desde a Cemma.
A Cemma recolle en seis meses 13.256 fotografías de arroaces
Expón a Cemma que “a pesares de que aínda queda moito traballo por realizar, a revisión deste enorme arquivo fotográfico, e a incorporación dos datos obtidos nas mostraxes TurGaSur, así como os procedentes doutras entidades e persoas que están a colaborar co proxecto, permitiu obter información de grande interese referida ás recapturas fotográficas de individuos que tiñan sido rexistrados con anterioridade”, como é o caso dos rescatados na toxa.
