A Asociación Orca Ibérica compartiu a través das súas redes sociais os últimos movementos das candorcas (Orcinus orca) que se atopan en augas nacionais. A Coordinadora para o Estudo de Mamíferos Mariños (CEMMA) confirma que hai un grupo destes cetáceos xa de camiño ao norte de Galicia: “Avisounos un barco mediante a aplicación GT Orcas dun avistamento fronte á Illa de Ons, a 26 millas da costa“, explica o presidente do CEMMA e membro do Grupo de Traballo Orca Atlántica Alfredo López.
López sinala que o motivo do desprazamento das candorcas é a alimentación: “Esperan o atún no Estreito e, unha vez que pasa por aí, elas ségueno, por iso chegan ás nosas costas”. Deste xeito, o atún vermello, que é a principal presa destes cetáceos, marca os seus movementos e dirixe os grupos entre o Estreito de Xibraltar e o Golfo de Biscaia.
O presidente da CEMMA conta que este grupo sería o segundo rexistrado na tempada actual: “Xa pasou un, e veñen outros dous pola costa portuguesa”. López admite que aínda é un pouco cedo para a chegada dos animais, pero indica que o seu ritmo vén marcado polo atún e, por iso, os seus desprazamentos non seguirán unha precisión milimétrica.
Que facer ante un avistamento
Alfredo López aclara como debe actuar unha embarcación no caso de avistar unha candorca ou un grupo das mesmas: “Debe rexistrar o caso, dar aviso e non achegarse para evitar as interaccións”. O presidente da CEMMA explica que o mellor curso de actuación é deter a embarcación: “Sabemos que a velocidade e o movemento propician a interacción. Ese comportamento [parar o barco] reduce os contactos con elas nun 60%, pero non nun 100%. Non hai unha solución máxica”, conclúe. Os cetáceos responden a estímulos, mais aínda non está claro cal é o motivo polo que se achegan ás embarcacións. Deste xeito, manter a distancia e eliminar o movemento son as dúas claves para facer que o encontro remate coa maior seguridade posible.
