O mosquito tigre xa está en Tui. Así o confirmou a Rede Galega de Vixilancia de Vectores (Regavivec), da que tamén forman parte as Universidades de Vigo e Santiago de Compostela. A identificación realizouse por parte dos entomólogos da rede tras unha notificación dun veciño de Tui a través da aplicación de ciencia cidadá Mosquito Alert.
Esta achega realizada a través da aplicación móbil foi esencial, unha vez máis, para que os especialistas en entomoloxía puidesen confirmar a presenza no concello. Desde a Regavivec, e en colaboración co Concello de Tui, ampliarase a vixilancia deste vector colocando trampas para avaliar a extensión e abundancia do mosquito tigre.
Tui xa é o terceiro concello no que avanza o mosquito tigre este ano, despois dos exemplares identificados en Bueu e en Mos. Súmanse así aos de Moaña, Vigo, Cangas, Redondela, O Porriño e Vilaboa como integrantes do comité técnico do mosquito tigre, que se convocará a finais deste mes.
Recomendacións ante o seu avance
Desde a Consellería de Sanidade agradécese a participación cidadá seguindo os consellos para evitar a proliferación deste insecto, que é vector de enfermidades como son o dengue, chikungunya ou Zika. Por iso, lembran que a maneira máis efectiva de evitar esta proliferación é impedir a posta de ovos e o crecemento das larvas. Para isto, hai pautas sinxelas como eliminar puntos de auga estancada en bebedeiros, pratos baixo macetas, caldeiros á intemperie ou embarcacións co seu simple baleirado ou coa renovación da auga cada 4-5 días, que poden axudar a frear o seu avance.
Para evitar as picadas do mosquito tigre aconséllase o uso de repelentes específicos que se poden atopar nas listaxes de produtos autorizados, ademais de recomendar vestir con manga e pantalóns largos e calzado pechado ou colocar mosquiteiros en portas e ventás. As picadas poden ser molestas e, nalgúns casos, producen reaccións alérxicas de certa gravidade.
