O mosquito tigre (Aedes albopictus) foi detectado por primeira vez en Galicia no ano 2023, na parroquia morañesa de Tirán. Cada ano, a súa área de distribución expándese cada vez máis ao longo e ancho da comunidade. O concello da Coruña rexistra por primeira vez a presenza desta especie orixinaria do sueste asiático, segundo datos actualizados da Rede Galega de Vixilancia de Vectores (ReGaViVec), converténdose no único rexistro da zona norte.
Engádese así aos doce concellos do sur nos que xa se coñece a súa presenza: Moaña, Vigo, Cangas, Redondela, Vilaboa, O Porriño, Tui, Mos, Bueu, Ponteareas, Poio e Salvaterra de Miño. Este ano, o primeiro exemplar foi detectado en Redondela.
Durante o 2025 rexistráronse 446 exemplares mediante a aplicación de ciencia cidadá Mosquito Alert. Fronte a posible ameaza, xa que o mosquito tigre pode actuar como vector de enfermidades como o zika, o dengue ou o chikungunya, en 2026 son 31 concellos os que participan na Rede Galega a fin de identificar os principais organismos transmisores de enfermidades.
Por que Galicia?
En Galicia, o mosquito tigre atopa un hábitat propicio para a súa supervivencia. As temperaturas suaves, xunto coa elevada humidade e as precipitacións frecuentes, favorecen a súa reprodución e expansión. Ademais, amosa unha clara preferencia polos espazos urbanos, onde adoita criar en pequenos depósitos de auga presentes en contornas domésticas. Esta é, de feito, unha das súas principais particularidades: utiliza recipientes e acumulacións de auga estancada de pequeno tamaño —como pratos de macetas ou bebedoiros de animais— para completar o seu ciclo reprodutivo.
