A primavera non chega só acompañada de bo tempo, senón tamén de insectos. Neste contexto, regresa o mosquito tigre: o primeiro caso do ano foi identificado o 9 de abril no concello pontevedrés de Redondela. O achado foi comunicado por un usuario a través da aplicación de ciencia cidadá Mosquito Alert, onde se confirmou que se trataba de Aedes albopictus grazas á característica liña branca no tórax que distingue esta especie invasora.
En Galicia, este mosquito, orixinario do sueste asiático, foi detectado por vez primeira no verán de 2023 na parroquia morañesa de Tirán. A súa chegada ao Morrazo podería estar relacionada co tráfico portuario de Vigo, segundo apuntan diversas hipóteses. En total, durante 2025 rexistráronse 446 exemplares mediante a mesma aplicación, na que a cidadanía comparte imaxes de insectos sospeitosos que posteriormente son verificadas por persoal experto. Porén, a problemática deste insecto vai máis alá da súa capacidade invasora, xa que pode actuar como vector de enfermidades como o zika, o dengue ou o chikungunya
Características favorables en Galicia
En Galicia, o mosquito tigre atopa un hábitat propicio para a súa supervivencia. As temperaturas suaves, xunto coa elevada humidade e as precipitacións frecuentes, favorecen a súa reprodución e expansión. Ademais, amosa unha clara preferencia polos espazos urbanos, onde adoita criar en pequenos depósitos de auga presentes en contornas domésticas. Esta é, de feito, unha das súas principais particularidades: utiliza recipientes e acumulacións de auga estancada de pequeno tamaño —como pratos de macetas ou bebedoiros de animais— para completar o seu ciclo reprodutivo.
