A Xunta de Galicia activa este venres o nivel de alerta 3 (vermello) por episodio de calor no interior de Pontevedra e o nivel de alerta 2 (laranxa) no noroeste e interior da provincia da Coruña, segundo o Plan de Actuacións da Xunta de Galicia. Os concellos afectados serán Agolada, O Campo Lameiro, A Caniza, Cerdedo Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
Meteogalicia informa que as altas presións están localizadas dende hoxe ao norte da península ibérica, achegando aire moi cálido de orixe norteafricana. A presenza desta masa de aire, xunto cos ceos moi abertos que propicia a situación anticiclónica, darán que as temperaturas ascendan notablemente. Nas xornadas do venres e o sábado espérase que as máximas superen os 35ºC en moitos puntos do interior de Pontevedra.
Ademais, a Secretaría Xeral para o Deporte, determinou a suspensión da actividade deportiva federada e do programa Xogade no exterior nos concellos afectados pola alerta vermella durante o venres. Con todo, a situación de forte calor podería ir remitindo lentamente na xornada do domingo.
Noites tropicais
O concepto noite tropical fai referencia a aquelas noites nas cales a temperatura mínima non descende por debaixo dos 20ºC. O Barbanza e o sur da Costa da Morte foron as localizacións asociadas coa calor na madrugada do 12 de xuño, entre as 2 e as 7 horas. En Corrubedo e Santa María de Lira rexistráronse 22,3ºC e, en Vigo, 21,3ºC. As Illas Cíes superaron a barreira cun valor de 20,9ºC.
Efectos na saúde
Os principais grupos de risco ante os efectos da calor son os maiores de 65 anos e nenos menores de 4, sobre todo os menores dun ano; persoas que padece enfermidades cardiovasculares, diabetes mellitus, enfermidade pulmonar obstrutiva crónica, insuficiencia renal, párkinson, alzhéimer ou patoloxías similares, e enfermidade psiquiátrica; persoas que tomen determinados fármacos ou tóxicos; e persoas maiores que viven soas, en vivendas mal acondicionadas, persoas con exceso de peso ou peso excesivamente baixo, trabalhadores, deportistas ou que pasan horas en exteriores.
Así, a exposición a temperaturas excesivas pode provocar mareos, cansazo, debilidade, fatiga e cambras musculares, ademais de síncopes, deshidratación, insolación e golpes de calor. A maioría das enfermidades asociadas á calor son consecuencia dun fallo no sistema de termorregulación, xa que unha temperatura moi elevada produce a perda de líquidos e electrólitos, necesarios para o funcionamento dos órganos.
Recomendacións fronte á calor
A Consellería de Sanidade lembra os principais conselhos e recomendacións que debe seguir a poboación:
—Beber máis líquidos sen esperar a ter sede, sobre todo auga e zumes de froita lixeiramente fríos. Pola contra, evitar bebidas quentes, alcohólicas, café, té ou cola e as moi azucradas.
—Aumentar o consumo de ensaladas, verduras e froitas. Evitar comidas copiosas: comer menos cantidade e máis veces ao día.
—Manter os alimentos no frigorífico e vixiar sempre as medidas hixiénicas.
—Usar roupa de tecidos naturais, lixeira e folgada, de cores claras, chapeu, lentes de sol e cremas protectoras solares, así como calzado fresco, cómodo e que transpire.
—Permanecer en espazos ventilados ou acondicionados e estar á sombra, utilizar os cuartos máis frescos e, durante o día, baixar as persianas e pechar as fiestras; abrilas pola noite para ventilar.
—Evitar as actividades ao aire libre nas horas de máis calor e reducir a actividade física.
—Cando se estacione o coche, non deixar no interior nenos nin anciáns coas fiestras pechadas.
