O impacto das frontes atlánticas asociadas á borrasca Bruna aínda se fan notar en Galicia a través das fortes precipitacións. Con todo, unha nova zona de baixas presións de orixe subtropical, composta no Atlántico occidental, regará Galicia con chuvias abundantes durante o mércores 11 de novembro, segundo informa MeteoGalicia. A borrasca Charles —bautizada así polo Instituto Portugués do Mar e da Atmosfera (IPMA)— percorre o Atlántico para situarse ao oeste da Península.
A axencia meteorolóxica galega anuncia a alerta amarela por chuvia no sur e na montaña de Ourense para o día 11 por acumulación de máis de 40 litros por metro cadrado (l/m2) nunha hora. As precipitacións máis intensas estarán rexistradas nas provincias de Lugo e Ourense. Así, as previsións indican que Charles entrará por Portugal, máis concretamente por Lisboa, con chuvias moi intensas e refachos de vento.
Pola súa banda, a Axencia Estatal de Meteoroloxía (Aemet) lanza un aviso especial polo impacto das dúas borrascas sobre a península a causa das chuvias persistentes, vento forte e temporal marítimo ata o xoves 12. Tamén anuncia que os litorais do oeste de Galicia poderán superar os 70 km/h, xunto a mar combinado con ondas de 4 a 5 metros.
Segundo un dos escenarios dos modelos europeos, avanzaría cara ao nordeste e, arredor das 22 horas, podería situarse entre o norte de Portugal, Galicia, e Castela e León.
