Un novo río atmosférico encherá de humidade as borrascas atlánticas que chegarán por Galicia á península ao longo da semana. Así, a comunidade converterase nunha das máis chuviosas, xunto ao sur de Castela e León e o norte de Extremadura. As cifras apuntan a máis de 50 litros por metro cadrado (l/m²) en menos de 12 horas no oeste galego. En consecuencia, MeteoGalicia declara a alerta laranxa por vento na Mariña lucense, con refachos de máis de 100 km/h, e alertas tanto laranxas como amarelas en toda a costa por mar de vento. Ademais, o mapa enche toda Galicia en amarelo por precipitacións e vento.
Na xornada do luns 16 de novembro chegará a primeira fronte da semana deixando chuvias febles, tal e como sinala a axencia meteorolóxica galega. Esta traerá consigo unha maior persistencia e intensidade, con máis de 40 milímetros en 12 horas. Mentres, o martes entrará unha fronte máis activa, que chegará á península tamén por Galicia, con maior forza de precipitación durante a madrugada.
Segundo explica MeteoGalicia, a chuvia intensa sucederase en tres noites: de luns a martes, de martes a mércores, e de mércores a xoves. Así, o mércores podería ser o día máis chuvioso da semana, aínda que as precipitacións serán practicamente xeralizadas.













