Galicia participa nun estudo internacional que sinala o músculo esquelético como clave na adaptación ao frío

O traballo vincula a falta de α-actinina-3 á resistencia fronte ás baixas temperaturas, vinculado a unha variante xenética que portan 1.500 millóns de persoas

O líder do grupo Inmunoxenética do Instituto de Investigacións Sanitarias de Santiago de Compostela (IDIS), Roberto Díaz Peña, forma parte do equipo internacional —Murdoch Children’s Research Institute de Melbourne, Instituto Karolinska, Universidade de Yale, Wellcome Sanger Institute e Universidade Europea de Madrid, entre outros centros— que estuda as persoas que carecen da proteína muscular α-actinina-3 por unha variante xenética común. “Neste traballo estudamos que lle ocorre a ese músculo cando se expón ao frío”, explica o investigador.

“Ao redor do 16% da poboación mundial, uns 1.500 millóns de persoas, carecen dela”, explica o investigador do IDIS. Sabíase que esta carencia penaliza o rendemento en esforzos explosivos, por iso é polo que o xenotipo responsable desta deficiencia (coñecido como ACTN3 577XX) estea fortemente infrarrepresentado na elite mundial de disciplinas de potencia e velocidade pura. En contraste, numerosos estudos describiron unha sobrerrepresentación deste mesmo perfil xenético en fondistas de alto nivel, asociando a falta da proteína a unha maior capacidade oxidativa das fibras musculares e a unha superior economía do esforzo.

Publicidade

Como o investigaron

Agora, empregando un modelo de rato modificado xeneticamente para que careces de α-actinina-3, comprobaron que a deficiencia protexe o músculo: “Resiste mellor a exposición aguda a baixas temperaturas, perde menos masa muscular e aguanta máis a fatiga, grazas a un metabolismo máis oxidativo e a unha resposta termoxénica máis eficiente”. Tal e como sinala o investigador do IDIS, varios destes trazos confirmáronse tamén en biopsias musculares de persoas co xenotipo 577XX.

En conxunto, o traballo ofrece unha explicación molecular sólida de por que a perda da α-actinina-3 puido supor unha vantaxe cando os nosos antepasados migraron cara a climas máis fríos e reforza o papel fundamental que xoga o músculo esquelético na regulación da temperatura e o metabolismo corporal.


Referencia: α-Actinin-3 deficiency protects skeletal muscle function from the effects of acute cold exposure (Publicado en Journal of Sport and Health Science)

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Científicos galegos achan as claves que determinan o éxito da inmunoterapia no cancro de pulmón

Un equipo do IIS Galicia Sur desenvolve un modelo preditivo que permitirá avanzar cara a unha medicina máis personalizada e tratamentos máis efectivos

Científicos galegos e arxentinos desvelan o potencial do cacho de gambón para protexer a retina

Un estudo desenvolve nanopartículas antioxidantes derivadas de residuos pesqueiros con resultados prometedores en probas in vitro

Un estudo do IDIS identifica proteínas asociadas coa arritmia sostida máis frecuente na poboación

O traballo, dirixido por Sonia Eiras, recibe o premio á mellor comunicación oral do Congreso da Sociedade Española de Cardioloxía 2026

O aire polar provocará un descenso brusco das temperaturas dende o martes en Galicia

O descenso térmico irá acompañado de vento de mar no litoral da Coruña, onde se ditamina a alerta amarela