Unha dorsal subtropical chega a Galicia con temperaturas máximas que superarán os 30 graos en toda a comunidade. Por iso, MeteoGalicia proclama a alerta amarela por calor para o venres 12 e sábado 13 de xuño, cos termómetros situándose por riba dos 36 graos no Miño de Ourense e na Ribeira Sacra. Con todo, o aviso esténdese cara ao litoral de Pontevedra e a zona do Miño da provincia, onde os valores descenderán uns puntos, ata superar os 34 graos.
O sábado reducirase a área afectada, eliminando a zona norte de Pontevedra da ecuación. Segundo o horario facilitado pola axencia meteorolóxica galega, os momentos de máis temperatura concentraranse nas horas puntas da tarde: entre as 15 e as 21 horas.
O motivo desta nova suba de temperaturas é unha combinación de masas de aire cálido. Por unha banda, unha masa subtropical procedente do norte de África e, por outra, o quecemento do aire sobre a península. O venres será o día máis caluroso, pero cara ao domingo, permanecerá un escenario de inestabilidade atmosférica con maior probabilidade de tormentas, aínda que as temperaturas seguirán sendo elevadas.
