Un equipo de investigadores das universidades de Vigo e de León patentou un sistema de avaliación do equilibrio dinámico e de risco de caídas destinado a persoas maiores. A invención, aprobada pola Oficina Española de Patentes e Marcas (OEPM), ten como eixo un acelerómetro que mide o centro de gravidade do corpo. Conectado a unha unidade de procesamento de datos, interpreta mediante algoritmos a información xerada. Este mecanismo permite detectar precozmente a existencia dunha posible deterioración no control da postura, o que incrementa o risco de sufrir unha caída.
Os expertos destacan a importancia de desenvolver ferramentas para avaliar de forma temperá o equilibrio. José Luis García Soidán, investigador da Facultade de Ciencias da Educación e do Deporte da Universidade de Vigo (UVigo), apunta a que as probas realizadas nas contornas clínicas non sempre conseguen detectar inicialmente esa deterioración. “Con esta ferramenta, fomos capaces de resolver este problema”, afirma o investigador, que lembra que o risco aumenta coa idade. Segundo a OMS, estímase que o 35% das persoas maiores de 65 anos e o 65% por riba dos 80 sufrirán, cando menos, unha caída ao ano.
Os traballos nesta investigación comezaron hai unha década. Inicialmente, estudaron cal sería o punto exacto da zona lumbar no que situar o acelerómetro. Os investigadores buscaban o centro de gravidade do suxeito. A partir de aí, traballaron na identificación e interpretación dos datos que permiten detectar precozmente pequenos cambios provocados polo proceso de envellecemento.
A idade, un dos principais factores de risco
A patente recolle os algoritmos que tratan eses datos tras percorrer varias veces unha distancia de 10 metros. A invención conta cuns limiares fixados nas variables que o equipo investigador identificou para detectar esa alteración do equilibrio dinámico que xera riscos de caídas durante a marcha. Para iso o equipo realizou previamente un conxunto de medicións con persoas con e sen patoloxías deste tipo. Ese proceso permitiu determinar cales son os valores mínimos onde comeza o risco.
“A idade é un dos principais factores”, advirten os investigadores. Estes esperan que o sistema supoña unha mellora substancial á hora de abordar posibles problemas de dependencia. A innovación é froito das investigacións de José Luis García Soidán e Vicente Romo, da Facultade de Ciencias da Educación e do Deporte da UVigo, xunto con Raquel Leirós e José Alberto Benítez, da Universidad de León.
Podes ler a noticia do DUVI na seguinte ligazón.
