Combinar a realidade virtual con actividade física axuda a mellorar a vida de persoas con dano cerebral adquirido. Así o constatou un proxecto innovador desenrolado pola Universidade de Vigo e Cruz Vermella que vén de ser presentado recentemente en Lugo.
Ao longo de case cinco meses, un grupo de 14 persoas sometéronse a un experimento para valorar a posibilidade de aplicar a realidade virtual aos tratamentos para persoas que sofren as consecuencias de accidentes cardiovasculares, traumatismos cranioencefálicos, tumores ou infeccións cerebrais.
Durante 19 semanas, os participantes poñíanse lentes de realidade aumentada nos que realizaban exergames, videoxogos cunha compoñente física. Isto combinábase cun cicloergómetro, unha bicicleta estática que tamén permite traballar cos brazos e outras partes do corpo.
Os resultados foron unha mellora da capacidade funcional con “avances significativos en forza muscular e autonomía”. Os participantes tamén viron aumentada a súa flexibilidade cognitiva, alén doutras melloras a nivel físico e mental.
Ampliación do estudo
Agora, os promotores desta iniciativa encabezada polo investigador e profesor Pablo Campo pretenden ampliar o proxecto para aumentar a mostraxe e avaliar a posibilidade de levalo a outros campos.
O seguinte paso é abordar aspectos de estimulación neurocognitiva. Desta volta, farase a través dun novo programa de exercicio físico que elevará a intensidade á que se someterá aos participantes.
O estudo, pioneiro no seu ámbito, foi desenvolvido no Centro de Parálise e Dano Celebral de Cruz Vermella na localidade de Ribeiras de Lea, no concello lugués de Castro de Rei. As súas conclusións recóllense nun artigo publicado recentemente na revista científica Journal Electronics.
