Tres persoas morreron nas últimas semanas tras un novo gromo de sarampelo nos Estados Unidos, que afecta sobre todo ao estado de Texas. Dúas das vítimas tiñan apenas oito anos e non estaban vacinadas. O país americano xa ten máis do dobre de positivos por sarampelo que os que rexistrou durante todo o 2024. As tres defuncións dos últimos meses xa igualan as rexistradas no país durante os anteriores 24 anos.
O principal foco destes contaxios atópase no condado de Gaines. Cunha poboación de 22.892 persoas, rexistrou 328 dos 607 casos identificados no país desde xaneiro. O principal motivo desta situación é que o territorio ten unha baixa taxa de vacinación. O medo agora é que se estenda a outras zonas próximas. De momento, tamén se están detectando positivos noutros estados como Kansas, Oklahoma, Novo México, Ohio e Indiana.
A OMS emitiu o pasado outubro unha alerta epidemiolóxica ante os novos datos rexistrados en América. As estimacións apuntan a que no 2023 morreron ata 107.500 persoas no mundo por esta doenza. Antes do descubrimento da vacina, as epidemias eran máis habituais e podían causar ata 2,6 millóns de mortos cada ano.
O sarampelo é un virus altamente contaxioso que se pode transmitir polo aire durante dúas horas. Algúns dos seus síntomas son: manchas na pel, broullas, febre, diarrea, cegueira e, nalgúns casos, inflamacións nos pulmóns e no cerebro. A enfermidade non ten tratamento máis alá do paliativo, de aí a importancia de previr o contaxio.
Polémica visita de Kennedy
O secretario de Saúde dos Estados Unidos, Robert F. Kennedy Jr., visitou Texas tras a morte da segunda menor. O político é coñecido polo seu escepticismo fronte ás vacinas, aínda que a expansión do gromo actual provocou que cedese e recomendase a inoculación da vírica tripla.
“A miña intención é vir aquí tranquilamente para consolar as familias e estar coa comunidade neste momento de dor”, asegurou Kennedy. Anteriormente, o político recomendara tratamentos sen fundamento científico como pode ser a vitamina A, esteroides similares á cortisona e aceite de fígado de bacallau para tratar os síntomas. No condado de maior afectación, as vendas de alimentos e produtos con vitamina A aumentou. O abuso deste suplemento provocou nalgúns nenos episodios de intoxicación.
O sarampelo é unha enfermidade que se consideraba erradicada no país desde o ano 2000 ata que, en 2019, volveron a aparecer novos casos. As taxas de vacinación nos nenos diminuíron tras a pandemia de 2020. Esta doenza pódese evitar coa vacina vírica tripla, que ten unha efectividade do 97% cando se aplican as dúas doses.
