Galicia despídese das mangas curtas, as sandalias e os días de praia e dá paso a unha Semana Santa inestable, marcada polas tormentas e o brusco descenso térmico. Este venres 11, o inicio da Operación Saída para moitos galegos, a borrasca Olivier acende a alerta amarela por chuvascos localmente fortes e acompañados de tormenta no interior de Pontevedra e da Coruña, no noroeste de Ourense e na montaña, centro e sur de Lugo. Malia que o aviso activado por Meteogalicia só estará activo entre as 15 e as 21 horas deste venres, os próximos días continuarán marcados polo ambiente tormentoso e as baixas temperaturas, incluídos os festivos de Semana Santa.
A inestabilidade da fin de semana estará provocada polo aire frío en altura e o paso da borrasca Olivier. O sábado, as precipitacións serán máis intensas pola tarde e no interior, e poderán caer en forma de treboada. Para o domingo agárdase un escenario semellante, malia que as chuvias irán remitindo ao final do día. Un dos aspectos que caracteriza esta primeira fin de semana de vacacións para moitos galegos é o acusado descenso térmico. As máximas roldarán os 20 graos no sur —10 graos de diferenza respecto á primeira parte da semana— e descenderán ata os 15 en Santiago, A Coruña e Ferrol. As mínimas oscilarán entre os 10 e os 14 graos.
Dúas novas borrascas
A vindeira semana arrincará, de novo, marcada pola inestabilidade. Meteogalicia prognostica entre o luns 14 e venres 18 unha probabilidade de precipitación de entre o 75% e o 90% con máximas de tan só 15 graos e mínimas que non superarán os 6. Dende eltiempo.es sinalan que o luns podería entrar unha nova borrasca atlántica por Galicia, acompañada dunha masa de aire frío que provocará un novo descenso térmico entre martes e mércores. O tempo mellorará, previsiblemente, o Xoves Santo, que será un día de transición con ceos parcialmente nubrados e con ambiente máis estable.
Con todo, o Venres Santo está previsto que chegue unha nova borrasca, tamén polo noroeste peninsular, que traería abundantes e intensas precipitacións que entrarían por Galicia e se xeneralizarían a toda a península, sobre todo no norte e no centro. As zonas nas que se prevé que máis chova son Galicia, Castela e León e norte de Aragón. Non obstante, os distintos servizos de meteoroloxía advirten da incerteza do prognóstico e das probabilidades de que vaia mudando conforme avancen os días. De momento, a Semana Santa de 2025 semella que en Galicia virá pasada por auga.
